ەلباسى ابۋ- ءدابيدىڭ تاق مۇراگەرىمەن كەزدەستى
بۇل تۋرالى قازاقپارات elbasy.kz سايتىنا سىلتەمە جاساپ حابارلايدى.
نۇرسۇلتان نازاربايەۆ پەن ابۋ- ءدابيدىڭ تاق مۇراگەرى قازاقستان مەن بىرىككەن اراب امىرلىكتەرى اراسىنداعى ءداستۇرلى دوستىق قاتىناستاردىڭ قارقىندى دامىپ كەلە جاتقانىنا جوعارى باعا بەردى. وسى ورايدا قازاقستان پرەمەر- ءمينيسترى ا. ءماميننىڭ ابۋ- دابي قالاسىنا بارعان ساپارىنىڭ قورىتىندىسى اتاپ ءوتىلدى. بۇل ساپاردا قازاقستان ەكونوميكاسىنىڭ باسىم سالالارىندا جالپى ينۆەستيتسيا كولەمى 6 ميلليارد دوللاردان اساتىن جوبالاردى دامىتۋ ءۇشىن ۇزاق مەرزىمدى ستراتەگيالىق ارىپتەستىك ورناتۋ تۋرالى ۇكىمەتارالىق قۇجاتقا قول قويىلعان بولاتىن.
ەلباسى بىرىككەن اراب امىرلىكتەرىنىڭ حالقىن ەلدىڭ قۇرىلعانىنا 50 جىل تولعان مەرەيلى تويىمەن شىن جۇرەكتەن قۇتتىقتاپ، از عانا تاريحي كەزەڭدە ءار سالادا بيىك جەتىستىكتەرگە قول جەتكىزگەنىن ايرىقشا اتاپ ءوتتى. كەزدەسۋ بارىسىندا قازاقستاننىڭ تۇڭعىش پرەزيدەنتى شەيح مۇحاممەد بەن زايد ءال ناھايانعا «يادرولىق قارۋسىز الەم جانە جاھاندىق قاۋىپسىزدىك ءۇشىن نازاربايەۆ سىيلىعىن» تاپسىردى. ول تاق مۇراگەرىنە بەيبىتشىلىكتى، وڭىرلىك تۇراقتىلىق پەن ورنىقتى ەكونوميكالىق دامۋدى قامتاماسىز ەتۋگە قوسقان ۇلەسى ءۇشىن بەرىلدى.
ءوز كەزەگىندە مۇحاممەد بەن زايد ءال ناھايان ەلباسىعا جانە ن. نازاربايەۆ سىيلىعىن بەرۋ جونىندەگى كوميتەت مۇشەلەرىنە ءوزىنىڭ قىزمەتىن جوعارى باعالاعانى ءۇشىن ريزاشىلىعىن ءبىلدىردى. نۇرسۇلتان نازاربايەۆتىڭ قازاقستان مەن بىرىككەن اراب امىرلىكتەرى اراسىندا قارىم- قاتىناس ورناتۋ مەن نىعايتۋعا قوسقان زور ءرولى مەن ەڭبەگىن اتاپ وتكەن ابۋ- ءدابيدىڭ تاق مۇراگەرى باۋىرلاس مەملەكەتتەر اراسىنداعى ىنتىماقتاستىق الداعى ۋاقىتتا تەرەڭدەي تۇسەتىنىنە سەنىم ءبىلدىردى. سونداي- اق اڭگىمە بارىسىندا تاراپتار حالىقارالىق جانە وڭىرلىك كۇن تارتىبىندەگى وزەكتى ماسەلەلەرگە قاتىستى ءوزارا پىكىر الىستى.
انىقتاما ءۇشىن:
«يادرولىق قارۋسىز الەم جانە جاھاندىق قاۋىپسىزدىك ءۇشىن نازاربايەۆ سىيلىعىن» ق ر تۇڭعىش پرەزيدەنتى - ەلباسى 2016 -جىلى تاعايىندادى. ول يادرولىق قارۋدى تاراتپاۋعا، يادرولىق سىناقتاردى توقتاتۋعا، يادرولىق ەنەرگيانى بەيبىت ماقساتتا پايدالانۋعا قوسقان اسا زور ۇلەسى ءۇشىن، سونداي- اق بەيبىتشىلىك پەن دوستىقتى، حالىقتار اراسىنداعى ءوزارا سەنىمدى نىعايتۋعا، مەملەكەتارالىق قاتىناستاردا تەڭدىك پەن تەڭ قاۋىپسىزدىكتى قامتاماسىز ەتۋگە باعىتتالعان بەلسەندى قىزمەتى ءۇشىن بەرىلەدى.
بۇعان دەيىن يوردانيا كورولى ابداللا، ماگاتە- ءنىڭ باس ديرەكتورى يۋكيا امانو، يادرولىق سىناقتارعا جاپپاي تىيىم سالۋ تۋرالى شارت ۇيىمىنىڭ اتقارۋشى حاتشىسى لاسسينا زەربو وسى سىيلىقپەن ماراپاتتالدى.