بۇل تۋرالى قازاقپارات تىلشىسىنە №36 قالالىق ەمحانانىڭ تەراپيەۆت دارىگەرى سابىرجان جارىمحان ايتىپ بەردى.
دارىگەردىڭ ايتۋىنشا، عالىمداردىڭ زەرتتەۋلەرىنە سايكەس، ەگدە ادامدار ۆيرۋس ينفەكتسياسىن اۋىر كوتەرەدى.
«دۇنيەجۇزىلىك دەنساۋلىق ساقتاۋ ۇيىمىنىڭ كلاسسيفيكاتسياسى بويىنشا ەگدە جاستاعىلار - 60 - 74 جاس، كارىلىك - 75 - 90 جاس، ۇزاق ءومىر سۇرەتىندەر - 90 جاستان اسقاندار بولىپ بولىنەدى. بۇل توپتاردىڭ جاس جانە ورتا جاستاعى ادامدارعا قاراعاندا كوروناۆيرۋستان اسقىنۋ مەن ءولىم قاۋپى ايتارلىقتاي جوعارى. 80 جاستان اسقان ادامداردا ءولىم كورسەتكىشى %15 عا جەتەدى، ال 50 جاسقا دەيىنگى ادامداردا %0,5 دان از. كوروناۆيرۋسپەن اۋىرعاننان كەيىن ناۋقاستار ترومبوزبەن، كوگنيتيۆتى فۋنكتسيانىڭ تومەندەۋىمەن جانە جۇرەك- تامىر جۇيەسى اۋرۋلارىمەن بايلانىستى اسقىنۋلاردى باستان كەشىرەدى. سونىمەن بىرگە ولاردا 3-ايدان 8-9-ايعا دەيىن اۋىر بەلگىلەر بولۋى مۇمكىن»، - دەدى سابىرجان جارىمحان.
دارىگەر اتاپ وتكەندەي، COVID-19-دان بولاتىن ءولىم- ءجىتىمنىڭ دۇنيەجۇزىلىك ستاتيستيكاسى وسى اۋرۋدان قايتىس بولعانداردىڭ اراسىندا ارتەريالىق گيپەرتونيا، جۇرەكتىڭ يشەميالىق اۋرۋى، قانت ديابەتى سەكىلدى ىلەسپەلى اۋرۋلارى بار ەگدە جاستاعى ادامداردىڭ ءجيى كەزدەسەتىنى دالەلدەندى.
«قازىرگى ۋاقىتتا ءبىزدىڭ كوروناۆيرۋسپەن كۇرەسۋدەگى نەگىزگى قۇرالىمىز - ۆاكسينا جانە الدىن الۋ شارالارىن ساقتاۋ. مۇنى ءبارى بىلەدى. ەگدە ادامدار باسقا ناۋقاستارعا قاراعاندا ۆاكتسيناتسيانى جاقسى كوتەرەدى. ولاردىڭ اراسىندا دەنە تەمپەراتۋراسىنىڭ كوتەرىلۋى، السىزدىك سياقتى شاعىمدار وتە از كەزدەسەدى. ال ەگەر ەكپەدەن كەيىن دە اۋىرىپ قالسا، وندا جەڭىل وتەدى»، - دەيدى ول. سونىمەن قاتار، دارىگەر قارت ادامدار اراسىندا اۋرۋدىڭ الدىن الۋ ءۇشىن ءبىرقاتار ماڭىزدى ۇسىنىستار ايتتى.
«ءبىز اتا- انامىزدى، قارت ادامداردى كوبىرەك اقپاراتتاندىرۋىمىز كەرەك. جانە نەگىزگى پروفيلاكتيكالىق شارالاردى ساقتاۋعا كومەكتەسۋىمىز قاجەت. بۇل توپتاعى ادامدار اسا قاجەت بولماسا، كوشەگە شىعۋدان، قوعامدىق ورىندارعا بارۋدان جانە قوعامدىق كولىكتى پايدالانۋدان باس تارتقاندارى ابزال. ماسكا تاعۋ جانە الەۋمەتتىك قاشىقتىقتى ساقتاۋدىڭ ماڭىزدىلىعىن ۇمىتپاعان ءجون. سونىمەن قاتار، ءۇي جاعدايىندا جاتتىعۋلار جاساپ وتىرعان دۇرىس. ەگەر تەمپەراتۋرا، قۇرعاق جوتەل، ەنتىگۋ سياقتى بەلگىلەر پايدا بولسا بىردەن ۇيگە دارىگەر شاقىرتۋ كەرەك»، - دەيدى سپيكەر.