الماتىدا ايەل كىشكەنتاي بالانى كولىك جۇرەتىن جولعا قالدىرىپ كەتتى - ۆيدەو
14:55, 21 - قازان 2021
الماتى. قازاقپارات - الماتىدا ايەل كىشكەنتاي بالانى كولىكتىڭ استىنا تاستاماق بولدى، دەپ حابارلايدى قازاقپارات ءتىلشىسى. ونىڭ ۆيدەوسى الەۋمەتتىك جەلىدە تارادى.
بەينەجازبادان بەيمالىم ايەلدىڭ بالانى كوشەگە شىعارىپ، كولىك جۇرەتىن جولعا قالدىرىپ كەتكەنىن كورۋگە بولادى. مۇنى بايقاعان بەيتانىس ەر ادام بالانى ورنىنان تۇرعىزىپ، جولدان الىپ كەتەدى. الماتى قالالىق پوليتسيا دەپارتامەنتى اتالمىش وقيعاعا قاتىستى تۇسىنىك بەردى.
«قازىر ناۋرىزباي اۋداندىق پوليتسيا باسقارماسى اتالعان فاكتى بويىنشا تەكسەرۋ جۇرگىزىپ جاتىر، ونىڭ ناتيجەسى بويىنشا ءمان-جاي انىقتالىپ، ق ر زاڭناماسىنا سايكەس شارالار قابىلداناتىن بولادى»، - دەپ حابارلادى پوليتسيادان.
اۆتور: الما مۇقانوۆا