سەنات ءتوراعاسى قازاقستاندىقتاردىڭ قانشا پايىزى قازاق ءتىلىن بىلەتىنىن ايتتى
بۇل تۋرالى ق ر پارلامەنتى سەناتىنىڭ ءتوراعاسى ماۋلەن اشىمبايەۆ ايتتى، دەپ حابارلايدى قازاقپارات ءتىلشىسى.
«ەكونوميكالىق جانە الەۋمەتتىك جاڭعىرۋدىڭ الەۋمەتتىك بازاسى جانە قوزعاۋشى كۇشى رەتىندە ورتا ساناتتىڭ قالىپتاسۋى دا ماڭىزدى وزگەرىس سانالادى. تاۋەلسىزدىك جىلدارىنىڭ ىشىندە ازاماتتارىمىزدىڭ ورتاشا تابىسى 13 ەسەدەن استامعا ارتقانىن ايتساق دا جەتكىلىكتى. كاسىپكەرلەر قاتارى دا ارتىپ كەلەدى. جەكە بيزنەستە جۇمىس ىستەپ تۇرعان سۋبەكتىلەر سانى 2021 -جىلدىڭ 1-قاڭتارىندا 1,4 ميلليوندى قۇرادى. 2005 -جىلدان باستاپ بۇل ءۇش ەسەگە جۋىق ءوسىمدى قۇرايدى»، - دەدى سەنات سپيكەرى قازاقستان الەۋمەتتانۋشىلارىنىڭ VII كونگرەسىندە.
ونىڭ اتاپ وتۋىنشە، ۋربانيزاتسيا قازاقستاندىق قوعامنىڭ الەۋمەتتىك ستراتيفيكاتسياسىنا ىقپال ەتەتىن ماڭىزدى ترەندتەردىڭ ءبىرى سانالادى. تاۋەلسىزدىك جىلدارى قالا حالقىنىڭ سانى 9 ميلليوننان 11 ميلليونعا دەيىن ارتىپ وتىر.
«30 جىلدىڭ ىشىندە ەلدىڭ دەموگرافيالىق بەيىنى، حالىقتىڭ ەتنيكالىق قۇرامى وزگەرىپ، جاڭا تىلدىك ورتا قالىپتاستى. قازاق ءتىلىن بىلەتىن حالىقتىڭ ۇلەسى 86 پايىزعا جەتتى. بۇل رەتتە قازاقستاندىقتاردىڭ 92 پايىزى ورىس ءتىلىن بىلەدى. ءبىز - جاس ۇلتپىز. قازاقستاندىقتاردىڭ ورتاشا جاسى شامامەن 32 نى قۇرايدى. سونىمەن قاتار ءومىر ءسۇرۋ ۇزاقتىعى دا ۇزارىپ كەلەدى»، - دەدى ماۋلەن اشىمبايەۆ.
اۆتور: مارلان جيەمباي