قازاقستاندا جۋساننان كوروناۆيرۋستى ەمدەيتىن ءدارى جاسالۋى مۇمكىن
قازاقستاندا وسەتىن ەمدىك شوپتەردىڭ ءبارىن فارماتسيەۆتيكالىق وندىرىستە پايدالانۋعا بولادى.
سەناتور دينار نوكەتايەۆا ۇكىمەت باسشىسىنا دەپۋتاتتىق ساۋال جولداپ، جۋساننان كوروناۆيرۋسقا قارسى ءدارى جاساۋعا ارنالعان زەرتتەۋلەردى قولداۋدى سۇرادى.
«بۇگىندە كوروناۆيرۋسقا قارسى ۆاكتسينا بار. الايدا الەم بويىنشا ەكپە العانداردىڭ اراسىندا ۆيرۋس جۇقتىرۋ جاعدايلارى تىركەلىپ جاتىر. سول سەبەپتى عالىمدار كوروناۆيرۋستىڭ ارنايى ءدارىسىن ىزدەۋگە كىرىستى. وسىمدىكتەردىڭ ەمدەۋ قاسيەتىن فارماتسيەۆتيكالىق پرەپارات رەتىندە پايدالانۋ تاجىريبەسى دە قاراستىرىلىپ وتىر»، - دەدى نوكەتايەۆا سەناتتىڭ جالپى وتىرىسىندا.
ونىڭ ايتۋىنشا، قازىر كوروناۆيرۋستان بولاتىن ءولىم- ءجىتىمدى ازايتۋ ماقساتىندا «ارتەسۋنات» پرەپاراتىن قولدانۋ ماسەلەسىن زەردەلەنىپ جاتىر. بۇل - بەزگەككە قارسى ءدارى. ونى جۋساننان جاسايدى، - دەپ جازادى sputnik.kz.
«قازاقستاندا وسى باعىتتى دامىتۋعا مۇمكىندىك بار. بىزدە ەمدىك شوپتەردىڭ ءتۇر- ءتۇرى وسەدى. سونىڭ ءبارىن فارماتسيەۆتيكالىق وندىرىستە پايدالانۋعا بولادى. ماسەلەن وڭتۇستىك ءوڭىر دارمينا جۋسانىنىڭ تابيعي ايماعى بولىپ سانالادى. ونىڭ قۇرامىندا «دارمينول» اتتى ەفير مايىنىڭ كوپ مولشەرى بار. بۇل زات ستافيلوكوكك، سترەپتوكوكك جانە تاعى باسقا باكتەريالار مەن ۆيرۋستارعا قارسى، ءتىپتى، قابىنۋعا قارسى كۇشتى اسەرى بار»، - دەپ اتاپ ءوتتى نوكەتايەۆا.
وسى ورايدا سەناتور قازاق كسر كەزىندەگى عالىمداردىڭ ەڭبەگىن ەسكە الدى. 80-جىلدارى ولار جۋساننان جاسالاتىن سانتونين ءدارىسىنىڭ تۇماۋعا قارسى ءتيىمدى ەكەنىن دالەلدەگەن.
«قازىرگى كەزدە عالىمدار ءدال وسى دارىگە كوۆيدكە قارسى پرەپارات رەتىندە ۇلكەن قىزىعۋشىلىق تانىتىپ وتىر. سول سەبەپتى جۋساننىڭ سىعىندىسى COVID-19 عا قالاي اسەر ەتەتىنىن وزىمىزدە زەرتتەۋ كەرەك. بۇگىندە وسى باعىتتا سوكولسكي اتىنداعى وتىن، كاتاليز بەن ەلەكتروحيميا ينستيتۋتىنىڭ عالىمدارى وسىمدىك شيكىزاتىنان Covid-19 جانە نەگىزگى ينفەكتسيالارعا قارسى جوعارى ءتيىمدى ءدارىنى جاساۋعا ارنالعان عىلىمي باعدارلامانى ىسكە اسىرىپ جاتىر. سوندىقتان كوروناۆيرۋسقا قارسى ءتيىمدى ءدارىنىڭ قازاقستاندا تابىلاتىنىن جوققا شىعارماۋمىز قاجەت»، - دەيدى نوكەتايەۆا.