پسيحيكانىڭ بۇزىلۋىن ەمدەۋگە بولادى – دارىگەر
بۇل تۋرالى ق ر دەنساۋلىق ساقتاۋ مينيسترلىگىنىڭ رەسپۋبليكالىق پسيحيكالىق دەنساۋلىق عىلىمي- پراكتيكالىق ورتالىعى باس ديرەكتورىنىڭ مىندەتىن اتقارۋشى قۋانىش التىنبەكوۆ وڭىرلىك كوممۋنيكاتسيالار الاڭىندا وتكەن بريفينگىدە ءمالىم ەتتى، دەپ حابارلايدى قازاقپارات ءتىلشىسى.
10-قازان - حالىقارالىق پسيحيكالىق دەنساۋلىق كۇنى. بيىل دۇنيەجۇزىلىك پسيحيكالىق دەنساۋلىق كۇنى «پسيحيكالىق دەنساۋلىق تۋرالى قامقورلىق بارلىعىنا: ونى شىندىققا اينالدىرايىق» ۇرانىمەن اتاپ وتىلەدى. قۋانىش التىنبەكوۆتىڭ ايتۋىنشا، ەلىمىزدە 17 ايماقتىق پسيحيكالىق دەنساۋلىق ورتالىعى، قالالىق ەمحانالاردىڭ قۇرىلىمىندا 82 العاشقى پسيحيكالىق دەنساۋلىق ورتالىعى، اۋداندىق دەڭگەيدە 201 پسيحيكالىق دەنساۋلىق بولمەسى قىزمەت ەتەدى.
«2018 -جىلعا دەيىن پسيحياتر دارىگەرلەردىڭ قابىلداۋى تەك پسيحياتريالىق ۇيىمداردا جۇزەگە اسىرىلاتىن. 2021 -جىلدىڭ 9 ايىندا العاشقى پسيحيكالىق دەنساۋلىق ورتالىقتارى مەن پسيحيكالىق دەنساۋلىق بولمەلەرىنە كومەككە 297464 ادام جۇگىندى. كورىپ وتىرعانىمىزداي، حالىققا كورسەتىلەتىن كومەك بۇرىنعىدان قولجەتىمدى بولا ءتۇستى. بۇل، پسيحيكالىق دەنساۋلىق سالاسىندا ناۋقاسقا باعدارلانعان كومەك كورسەتۋ ۇلگىسىن جەتىلدىرۋدىڭ ارقاسى»، - دەدى ول.
سونىمەن قاتار ول پسيحيكالىق دەنساۋلىق ورتالىقتارىندا پسيحيكالىق اۋىتقۋى بار ادامدارعا 735 توسەك- ورىنعا ارنالعان 16 كۇندىزگى ستاتسيونار جۇمىس ىستەيتىنىن ايتتى. بالالارعا كومەك كورسەتۋدى قولجەتىمدى ەتۋگە ۇلكەن كوڭىل ءبولىنىپ وتىر.
«سوڭعى جىلدا 65 توسەك- ورىنعا لايىقتالعان بالالارعا ارنالعان 3 كۇندىزگى ستاتسيونار بولىمشەسى قۇرىلدى. قاراعاندى وبلىسى مەن شىمكەنت قالاسىندا اۋىسىمىنا 20 جۇگىنۋدى قامتيتىن بالالارعا ارنالعان ەكى مەديتسينالىق- الەۋمەتتىك وڭالتۋ بولىمشەسى اشىلدى. وعان قوسا دەنساۋلىق ساقتاۋ ۇيىمدارىندا بالالار پسيحياترلارىنىڭ سانى ارتتى. بۇل كورسەتكىش 2017 -جىلعى 65-تەن 2020 -جىلى 97-گە دەيىن جەتتى»، - دەدى سپيكەر.
قۋانىش التىنبەكوۆ پسيحيكالىق دەنساۋلىقتى بايىپتى قابىلداۋ قاجەت ەكەنىن اتاپ ءوتتى. «پسيحيكانىڭ بۇزىلۋىن ەمدەۋگە بولادى جانە بۇل كۇردەلى: مۇندا ءدارى- دارمەكتەر، تەراپيا، فيزيكالىق بەلسەندىلىك جانە تاعى باسقالار بار»، - دەدى ول. دارىگەرلىك كادرلار بويىنشا 2021 -جىلى 124 پسيحياتر دارىگەر رەزيدەنتۋرانى اياقتاپ، دەنساۋلىق ساقتاۋ ۇيىمدارىندا جۇمىس ىستەۋگە كىرىسكەن.
اۆتور: الما مۇقانوۆا