قارجى پيراميداسى بولۋى مۇمكىن: زاڭسىز قىزمەت بەلگىلەرى بار ۇيىمداردىڭ ءتىزىمى جاريالاندى

نۇر- سۇلتان. قازاقپارات - ق ر قارجى نارىعىن رەتتەۋ جانە دامىتۋ اگەنتتىگى زاڭسىز قىزمەت بەلگىلەرى بار ۇيىمداردىڭ ءتىزىمىن جاريالادى، دەپ حابارلايدى قازاقپارات.

تىزىمگە 121 سۋبەكت، ونىڭ ىشىندە قارجى پيراميداسىنىڭ بەلگىلەرى بار 56 ۇيىم جانە 65 زاڭسىز ينۆەستيتسيالىق دەلدال (جالعان بروكەر) ەنگىزىلدى. اگەنتتىك ولاردىڭ قىزمەتىندە زاڭسىز قىزمەت بەلگىلەرىن انىقتادى.

ءتىزىمدى جاريالاۋ قارجىلىق قىزمەتتەردى تۇتىنۋشىلاردىڭ قۇقىقتارىن قورعاۋعا باعىتتالعان جانە وسىنداي كومپانيالارعا بايلانىستى تاۋەكەلدەردىڭ ۋاقتىلى الدىن الۋعا مۇمكىندىك بەرەدى. سونىمەن بىرگە وسىنداي ءتىزىمدى قالىپتاستىرۋ نارىقتاعى ءادىل باسەكەلەستىكتى قولداۋدى جانە زاڭسىز قىزمەت بەلگىلەرى بار سۋبەكتىلەردى ءتيىمدى تۇردە انىقتاۋدى قامتاماسىز ەتەدى. اگەنتتىك قارجى نارىعىنداعى زاڭسىز قاتىسۋشىلاردى مىنالار:

- ينتەرنەتتەگى اقپاراتتىق كەڭىستىكتى مونيتورينگتەۋ؛

- بلوگتار، فورۋمدار، بەينەحوستينگتەر جانە مەسسەندجەرلەر ارقىلى الەۋمەتتىك جەلىلەردى مونيتورينگتەۋ؛

- جەكە جانە زاڭدى تۇلعالاردىڭ وتىنىشتەرى (اعىمداعى جىلدىڭ باسىنان باستاپ اگەنتتىككە كۇماندى كومپانيالاردىڭ قىزمەتى بويىنشا جەكە جانە زاڭدى تۇلعالاردان 125 ءوتىنىش كەلىپ ءتۇستى)؛

- ازاماتتىق قوعام ينستيتۋتتارىن بىلدىرەتىن مەملەكەتتىك ورگاندارمەن جانە قوعامدىق ۇيىمدارمەن ءوزارا ءىس- قيمىل شەڭبەرىندە انىقتايدى. بارىنشا ءتيىمدى حاباردار بولۋ ماقساتىندا اگەنتتىك قارجى نارىعىنىڭ بارلىق سۋبەكتىلەرىنە كۇدىكتى كومپانيالار تۋرالى حابارلايدى. سونداي- اق وسىنداي كومپانيالاردىڭ سايتتارىن ودان ءارى تەكسەرۋ جانە بۇعاتتاۋ ءۇشىن قۇقىق قورعاۋ جانە باسقا دا ۋاكىلەتتى ورگاندارمەن بىرگە ءوزارا ارەكەت ەتەدى. زاڭسىز قىزمەت بەلگىلەرى بار ءاربىر كومپانيا بويىنشا اتاۋى، سايت مەكەنجايى، زاڭسىز قىزمەت سيپاتى كورسەتىلگەن.