قاجىلىققا بارۋدى جوسپارلاعان قازاقستاندىقتارعا قانداي ۆاكسينا العان دۇرىس

نۇر-سۇلتان. قازاقپارات - ق ر دەنساۋلىق ساقتاۋ ءمينيسترى الەكسەي سوي ۆاكسينا العان قازاقستاندىقتاردىڭ قاجالىققا بارۋ مۇمكىندىگى تۋرالى پىكىر ءبىلدىردى، دەپ حابارلايدى قازاقپارات ءتىلشىسى.

«جالپى العاندا، قاجىلىققا بارۋ ءۇشىن ءار ەل ءوز تالابىن قويادى. قازىر بىزدە Sinofarm كومپانياسىنىڭ ۆاكسيناسى بار. دۇنيەجۇزىلىك دەنساۋلىق ساقتاۋ ۇيىمى ونى اككرەديتتەدى. ياعني، ەگەر قاجىلىققا قابىلداۋشى ەل د د ۇ- دا تىركەلگەن ۆاكسينانىڭ بولۋىن تالاپ ەتسە، ونداي ۆاكسينا بىزدە بار دەگەن ءسوز. سونى قابىلداپ، قاجىلىققا شىعا بەرۋگە بولادى»، - دەدى مينيستر.

ۆەدومستۆو باسشىسى قازاقستاندىق QazVac ۆاكتسيناسىن دۇنيەجۇزىلىك دەنساۋلىق ساقتاۋ ۇيىمىندا تىركەۋ جۇمىستارى ءساتتى وتسە، ەكپەنىڭ وسى ءتۇرىن العاندار دا قاجىلىققا بارا الاتىنىن ەسكە سالدى.

«ءوزىمىزدىڭ QazVac بويىنشا ايتساق، قازىر دۇنيەجۇزىلىك دەنساۋلىق ساقتاۋ ۇيىمىندا تىركەلۋ ساتىسىنان ءوتىپ جاتقانىمىزدى بىلەسىزدەر. ۆاكسينا سول جاقتا تىركەۋدەن وتكەن بويدا، وزگە نارىقتارعا دا جولى اشىلادى. وزدەرىڭىز بىلەسىزدەر، قازاقستان ءوز ۆاكسيناسىن كلينيكالىق اينالىمعا ءىس جۇزىندە شىعارعان التىنشى مەملەكەت. ونى تۇگەل ءوز كۇشىمىزبەن جاسادىق. دۇنيەجۇزىلىك دەنساۋلىق ساقتاۋ ۇيىمىندا تىركەلگەن كوپتەگەن ەلدەردە، ترانسۇلتتىق كومپانيالاردا مۇنداي تىركەۋ پروتسەدۋرالارى جىلدار بويىندا قالىپتاسىپ قويعان. وعان ارنالعان ارنايى قىزمەتتەرى دە بار. ال بىزدە جاڭادان سونداي جۇيە ورناتىلىپ جاتىر. ءبىز حالىقارالىق قاۋىمداستىقتارمەن ينتەگراتسيالانىپ جاتىرمىز. تىركەلۋدىڭ الگوريتمدەرىن پىسىقتاپ، قۇجاتتاردى قالىپتاپ جاتىرمىز. ياعني ۇلكەن كەزەڭ دەۋگە بولادى. بۇل - قازاقستان ءۇشىن جاڭا جول. ءبىراق ءبىر جاعىنان سەرپىلىس دەۋگە بولادى. سوندىقتان، تىركەلگەن بويدا بۇكىل الەم بويىنشا قولجەتىمدى بولادى»، - دەدى الەكسەي سوي.