الاياقتار بانك سايتىندا وزگەلەردىڭ اتىنان نەسيە راسىمدەپ كەلگەن

كۇدىكتىلەر 24 پەن 36 جاستاعى، بۇرىن سوتتالماعان ازاماتتار بولىپ شىقتى. ولار ۇزاق ۋاقىت بويى تۇتىنۋشىلىق نەسيەلەردى راسەمدەپ كەلگەن.

«العاشقى تەرگەۋ ارەكەتتەرى بارىسىندا انىقتالعانداي، كۇدىكتىلەر ارىز- شاعىمدا كورسەتىلگەن ادامدارعا ايتپاستان جانە كەلىسىمىنسىز جەكە دەرەكتەرىن، سونداي- اق ولاردىڭ سۋرەتتەرىن نەمەسە بەينەفراگمەنتىن قولدانا وتىرىپ، بانكتىڭ سايتىندا ونلاين نەسيە الۋعا وتىنىمدەردى تولتىرعان. نەسيەلىك وتىنىمدەر ماقۇلدانعان سوڭ جانە كليەنتتەردىڭ شوتتارىنا قاراجات تۇسكەننەن كەيىن، قاراجاتتى ينتەرنەت- بانكينگ ارقىلى باسقا بانكتەردىڭ شوتتارىنا شىعارعان. وسىلايشا، بانكتەردىڭ بىرىنە جالپى سوماسى 10 ميلليون تەڭگەدەن استام ماتەريالدىق زالال كەلتىرىلدى»، - دەدى مەدەۋ اۋداندىق پوليتسيا باسقارماسىنىڭ باستىعى داۋرەن وتەبايەۆ.

پوليسەيلەر جۇرگىزگەن ارنايى شارا بارىسىندا الاياقتار انىقتالىپ، ۇستالدى. تەرگەۋ اياقتالعانشا، ەكەۋى دە ۋاقىتشا ۇستاۋ يزولياتورىنا قامالدى. قىلمىستىق ءىس قىلمىستىق كودەكستىڭ 190- بابى 4- بولىگى 2- تارماعى («اقپاراتتىق جۇيەنى پايدالانۋشىنى الداۋ نەمەسە سەنىمىنە قيانات جاساۋ ارقىلى جاسالعان الاياقتىق») بويىنشا تەرگەلۋدە.

ەگەر كۇدىكتىلەردىڭ كىناسى دالەلدەنسە، ولار 5 جىلدان 10 جىلعا دەيىن باس بوستاندىعىنان ايىرىلۋى مۇمكىن.