كاتوليك ارحيەپيسكوپى توماش پەتا قازاق حالقىنا ريزاشىلىعىن ءبىلدىردى
«2021 -جىل - قازاقستان تاۋەلسىزدىگىنىڭ 30 جىلدىق مەرەيتوي جىلى. تاۋەلسىزدىكتىڭ وسى 30 جىلدىعىن اتاپ وتە وتىرىپ، ءبىز سول ۋاقىت ارالىعىندا ءجۇرىپ وتكەن جولىمىزدا قانداي جاقسىلىقتار بولعانىنا كوز جۇگىرتكىمىز كەلەدى. تاۋەلسىز قازاقستان پارلامەنتىنىڭ ەڭ ءبىرىنشى قابىلداعان زاڭدارىنىڭ ءبىرى - ءدىني سەنىم بوستاندىعى جانە ءدىني بىرلەستىكتەر تۋرالى زاڭ بولعانىن اتاپ وتكەن ءجون. بۇل ءدىني قاۋىمنىڭ دامۋىنا، شىركەۋلەردى، موناح ۇيلەرىن سالۋعا مۇمكىندىك بەردى. وسى ۋاقىت ىشىندە كاتوليكتەر قاراعاندى قالاسىندا قۇداي انا فاتيمسكايا كافەدرالدى شىركەۋىنەن باستاپ كوپتەگەن ءدىني نىساندار سالدى. بۇل نىسان وتە كەرەمەت سالىنعان. مۇنان وزگە دە نىساندار بار»، - دەدى ول.
وسى رەتتە توماش پەتا قازاقستاننىڭ بۇكىل كاتوليكتەرى ءۇشىن ريم پاپاسى يوانن پاۆەل II -نىڭ ەلىمىزگە ساپارلاۋى ماڭىزدى وقيعا بولعانىن اتاپ ءوتتى.
«قازاقستان تاۋەلسىزدىگىنىڭ 10 جىلدىعىندا ريم پاپاسى ەلوردامىز استاناعا ساپارمەن كەلدى. كاتوليكتەر ءۇشىن بۇل مەملەكەتتىك ساپار ءدىندار باسشىسىنىڭ ساپارى سانالادى 2001 -جىلدىڭ قىركۇيەگىندە الاڭعا جينالعان ادامداردىڭ «اۋليەنى كورگىمىز كەلگەندىكتەن كەلدىك» دەپ ايتقاندارى ءالى ەسىمدە.
ريم پاپاسى ءوز ۇندەۋلەرىندە تەك قانا كاتوليكتەرگە عانا ەمەس، سونىمەن بىرگە بۇكىل قوعامعا، قازاقستاننىڭ بيلىگىنە جۇگىندى. بيلىككە «حالىقتار، قۇرلىقتار، دىندەر، مادەنيەتتەر اراسىنداعى كوپىر بولۋى ءتيىس ايرىقشا ميسسيا بار ەكەندىگىن» ايتتى. قازاقستان بيلىگى، اسىرەسە، ق ر تۇڭعىش پرەزيدەنتى - ەلباسى نۇرسۇلتان نازاربايەۆتىڭ ريم پاپاسىنىڭ وسى جۇزدەرىن جۇرەگىنە وتە جاقىن العانىن اتاپ وتكىم كەلەدى»، - دەدى توماش پەتا.
وسى رەتتە ارحيەپيسكوپ 2003 -جىلى ەلباسى نۇرسۇلتان نازاربايەۆ الەمدىك جانە ءداستۇرلى دىندەر كوشباسشىلارىنىڭ ءبىرىنشى سەزىن ۇيىمداستىرعانىن ەسكە سالدى.
«سول ۋاقىتتان بەرى 6 سەزد ءوتتى. ەندى مىنە 7 -سەزگە دايىندىق جۇرگىزىلىپ جاتىر. قۇداي قالاسا سەزگە دايىندىق جونىندەگى حاتشىلىقتىڭ وتىرىسى وتەدى»، - دەدى ول.
ونىڭ اتاپ وتۋىنشە، ريم پاپاسى ەلىمىزگە ساپارى اياسىندا سولتۇستىك قازاقستان وبلىسىندا ورنالاسقان وزەرنوە اۋىلىنا باردى. بۇل اۋىلدا قازاقستانداعى كاتوليكتەر ءۇشىن قاسيەتتى سانالاتىن «انا مەن وتان» الاڭى بار. اتالعان الاڭ بۇگىندە بۇكىل الەمگە تانىمال. ءدال وسى اۋىلدا «قازاقستان جۇلدىزى» التارى ورنالاسقان. وندا سوڭعى 2 جىل بويى جەرگىلىكتى جاماعات وكىلدەرىنىڭ ءبىرى تاڭەرتەڭنەن كەشكە دەيىن ءمىناجات ەتەدى. ءسوز سوڭىندا توماش پەت قازاق حالقىنا ريزاشىلىعىن ءبىلدىردى.
ايتا كەتەيىك، 6-قازاندا نۇر-سۇلتان قالاسىندا الەمدىك جانە ءداستۇرلى دىندەر كوشباسشىلارىنىڭ 7-سەزى وتەدى.
اۆتور: مارلان جيەمباي