داريعا نازاربايەۆا شىعارماشىل قاۋىمدى قازاق كوميكسىن دامىتۋعا شاقىردى
«بۇگىن ءبىز مەملەكەتتىك ءتىلدى ودان ءارى دامىتاتىن جۇمىستى قولعا الىپ وتىرمىز. نۇرسۇلتان نازاربايەۆ قورىنىڭ جۇمىسىنداعى نەگىزگى باعىتتاردىڭ ءبىرى - مەملەكەتتىك ءتىلدى دامىتۋ. قوردىڭ قۇرىلتايشىسى دا مۇنى باسا تاپسىرىپ وتىر. ءبىز ۇلكەن تالداۋ جۇرگىزدىك. مەكتەپكە دەيىنگى، مەكتەپ جاسىنداعى بالالارعا، جاسوسپىرىمدەرگە ارناپ جاسالعان قازاق تىلىندەگى ساپالى دۇنيەلەر وتە از. زاماناۋي ەرتەگىلەر، مۋلتيپليكاتسيالار جوق دەسە دە بولادى. جاس بۋىنعا ارنالعان كىتاپتار، تاريحي دۇنيەلەر، فيلمدەر دە جوق. جالعىز Balapan ارناسى وسىنىڭ ءبارىنىڭ ورنىن تولتىرۋعا تىرىسىپ جاتىر. ءبىراق ونىڭ دا دامۋىنا ۇلكەن قولداۋ كەرەك. ونىڭ ىشىندە الەۋەتى زور جەكە ارىپتەستەردىڭ ينۆەستيتسياسى قاجەت. سوندىقتان ءبىز وسىنداي سالماقتى شارۋانى قولعا الدىق»، - دەدى داريعا نازاربايەۆا ق ر تۇڭعىش پرەزيدەنت - ەلباسى نۇرسۇلتان نازاربايەۆ مۋزەيىندە وتكەن «ۇلى دالا اڭىزى» اتتى قازاق كوميكستەرىنىڭ تۇساۋىن كەسىپ تۇرىپ.
ونىڭ ايتۋىنشا، قازاق ءتىلدى ساپالى كونتەنتتىڭ از كەزىندە قالالى ورتادا ءوسىپ جاتقان، ۋربانيزاتسيالانعان بالالارعا مەملەكەتتىك ءتىلدى ۇيرەتۋ وڭاي بولىپ وتىرعان جوق.
«ۇيىمىزدە قازاقشا سويلەسىپ، بالالارىمىزدى قازاقشا بالاباقشالارعا، قازاق سىنىپتارى مەن مەكتەپتەرىنە بەرىپ جاتامىز. ءبىراق ءبىلىم وشاعى مەن ۇيدەن تىس جەردە ورىس ءتىلىنىڭ ۇلەسى ءالى دە باسىم. ءتىلى قازاقشا شىققان بالالار ورىس ءتىلىن وتە تەز مەڭگەرىپ كەتىپ جاتىر. ۋاقىتتىڭ شىندىعى وسى بولىپ تۇر. قازاق ءتىلى جاس بۋىننىڭ ءتىلى بولىپ قالىپتاسۋى ءۇشىن ورتا كەرەك. ول ورتا بالالاردىڭ انا تىلىنە دەگەن قىزىعۋشىلىعىن تەرەڭنەن قوزعاپ، سۇيىسپەنشىلىك قالىپتاستىرۋ كەرەك. بالالار ءۇشىن تىلدىك ورتا دەگەن ءبىرىنشى كەزەكتە كىتاپتار بولۋى ءتيىس. قازىر بالالار كىتاپ وقىمايدى دەپ ءجيى ايتىلادى. مەن ونىمەن كەلىسپەيمىن»، - دەگەن قور ديرەكتورى بالانىڭ قانداي دا ءبىر تەندەنتسياعا ەلتۋى وتباسىنداعى ورتاسىنا دا بايلانىستى ەكەنىن ەسكە سالدى.
«بىزگە بالالارعا ارنالعان مۋلتيپليكاتسيالار، باعدارلامالار، فەستيۆالدەر كەرەك، قازاق انيماتسياسىن دامىتۋعا ينۆەستيتسيا كەرەك. ءبىز بۇل ءىستى كوميكستەردەن باستاۋدى ءجون كوردىك. ول كوميكستەردىڭ باستاۋىندا ۇلتتىق كونە اڭىزدار مەن تاريحي شىعارمالار تۇر. ەندى وسىلاردى تولىقتىرىپ، جالعاستىرۋ ءۇشىن تالانتتى ادامداردى ورتاق ىسكە اتسالىسۋعا شاقىرامىز. ول ادامداردىڭ بىزگە جاڭا، زاماناۋي، سوڭى جاقسىلىقپەن تۇيىندەلەتىن، بالانىڭ ساناسىنا ادىلدىك پەن ىزگىلىك، مەيىرىم مەن سۇلۋلىق، شىنايى ماحاببات ءاردايىم جەڭەتىنىنە سەندىرە الاتىن ەرتەگىلەر اكەلۋى كەرەك. بۇگىنگى كورمە وسى ۇلكەن ءىستىڭ باستاۋى عانا»، - دەدى داريعا نازاربايەۆا.