الماتىدا تەرمينال بۇزعان ەر ادام ۆيدەوعا ءتۇسىپ قالدى

الماتى. قازاقپارات - الماتىدا تەرمينال بۇزۋشىنىڭ ارەكەتى ۆيدەوعا ءتۇسىپ قالدى، دەپ حابارلايدى قازاقپارات ءتىلشىسى.

الماتى قالالىق پوليتسيا دەپارتامەنتىنىڭ مالىمەتىنە سايكەس، ەر ادام ساۋدا ۇيلەرىنىڭ ءبىرىنىڭ كىرەبەرىسىندە ورناتىلعان بۋكمەكەرلىك كەڭسەلەردىڭ ءبىرىنىڭ تەرمينالىن بۇزىپ شامامەن 100 مىڭ تەڭگە العان. كۇدىكتى ءوتىپ بارا جاتقان ادامداردان ۇيالماستان تەرمينالداعى قۇلىپتى اشىپ، اقشا ساقتاۋ قۇرىلعىسىنا قول جەتكىزە وتىرىپ، قاجەتتى سومانى ءوزىنىڭ جەكە كابينەتىندەگى شوتىنا اۋدارعان. ونىڭ قىلمىستىق ارەكەتى بەينەباقىلاۋ كامەرالارىنا ءتۇسىپ قالعان.

«بۇل ءبىر جاعىنان كۇدىكتىنىڭ كىم ەكەنىن انىقتاۋعا جانە ونىڭ قىلمىسقا قاتىسىن دالەلدەۋگە مۇمكىندىك بەردى. 34 جاستاعى س. ەسىمدى ازامات ۇستالدى جانە قاماۋدا وتىر. ەر ادام قىلمىسىن بىردەن مويىندادى. ايعاقتى زاتتار تاركىلەندى»، - دەدى بوستاندىق اۋداندىق پوليسيا باسقارماسى باستىعىنىڭ مىندەتىن اتقارۋشى باتۋر ابدۋماساروۆ.

قىلمىستىق ءىس ق ر ق ك 188-بابى 3-بولىگىنىڭ 3-تارماعىندا كوزدەلگەن باپ بويىنشا تەرگەلىپ جاتىر.