ۆكونتاكتە قولدانۋشىسى «سىڭار» اككاۋنت ارقىلى ەلدەن اقشا الداپ العان

نۇر-سۇلتان. قازاقپارات - «ۆكونتاكتە» قولدانۋشىلاردىڭ سىڭار اككاۋنتىن قۇرىپ، سول ارقىلى تانىستارىنان اقشا الداپ العان ەلوردالىق تۇرعىن ۇستالدى، دەپ حابارلايدى قازاقپارات ءتىلشىسى.

بۇل تۋرالى نۇر-سۇلتان قالاسى پوليتسيا دەپارتامەنتىنىڭ باسپا ءسوز قىزمەتى حابارلادى.

«كۇدىكتى جەلى قولدانۋشىلارىنىڭ پاراقشالارىن اينا قاتەسىز كوشىرىپ الىپ، «دوستارىنان» ەلەكتروندى تولەم ارقىلى شۇعىل اقشا اۋدارۋدى سۇراعان. بويجەتكەن جەلىدەگى «سىڭارىنىڭ» اتىنان جولداعان حابارلامادا شۇعىل جاعدايعا تاپ بولعانىن ايتىپ، قارىزعا اقشا سۇرايدى. ادەتتە، 5-15 مىڭ تەڭگە كولەمىندە عانا الىپ وتىرعان. بۇل ايلاعا جەلى قولدانۋشىلارىنىڭ كوبى الدانعان. بۇگىنگە دەيىن الاياقتىق فاكتىسى بويىنشا ەلوردا پوليتسياسىنا بۇكىل قازاقستاننان 40 ازامات جۇگىندى. كەلتىرىلگەن زالالدىڭ جالپى سوماسى ەسەپتەلىپ جاتىر»، - دەپ جازادى دەپارتامەنتتىڭ باسپا ءسوز قىزمەتى.

جەدەل-ىزدەستىرۋ ءىس- شاراسىنىڭ اياسىندا پوليتسيا قىزمەتكەرلەرى ەلوردانىڭ 19 جاستاعى تۇرعىنىن كۇدىكتى رەتىندە ۇستاعان.

«كۇدىكتىنىڭ ۇستىنەن «الاياقتىق» بابى بويىنشا قىلمىستىق ءىس قوزعالدى. پوليتسيا ازاماتتارعا جەلىدە وتىرعان كەزدە ساق بولۋ كەرەكتىگىن ەسكەرتەدى. سىزدەن تانىسىڭىز الەۋمەتتىك جەلى ارقىلى قارىزعا اقشا سۇراسا، جۇزبە-ءجۇز كەزدەسۋدى ۇسىنىڭىز»، - دەپ كەڭەس بەرەدى پوليتسيا وكىلدەرى.