ا ق ش ءمايىتحانالارىندا ورىن جەتىسپەي جاتىر

نۇر-سۇلتان.قازاقپارات -ا ق ش- تىڭ ۆاشينگتون شتاتىنداعى كەي وڭىرلەردە ءمايىتحانادا ورىن جوق. ماماندار «كوروناۆيرۋستان كوز جۇمعانداردى جاتقىزاتىن جەر تاپپاي جاتىرمىز» دەپ دابىل قاعىپ وتىر.

ماسەلەن، كاۋليتس ءوڭىرىنىڭ بيلىگى وسى احۋالعا قاتىستى توتەنشە جاعداي جاريالاۋدى سۇرادى.

مۇندا قازىر جاڭا ءمايىتحانا سالىنىپ جاتىر. ءبىراق قۇرىلىس جۇمىستارىنىڭ اياقتالۋىنا ءالى ءبىر ايداي ۋاقىت قاجەت. سوندىقتان ايماققا توڭازىتقىش كامەراسى بار جۇك كولىكتەرى جىبەرىلەتىن بولدى. مايىتتەر ەندى سول جەردە ساقتالادى.

تيم دەۆيدسون، تەرگەۋشى:

- ءبىز مايىتتەردى ساقتايتىن ورىن تاپپاعاندىقتان قوسىمشا ۇستەلدەر دايىندادىق. كوز جۇمعان ناۋقاستاردى سول جەرگە جاتقىزۋعا تۋرا كەلەدى. مۇنداي جاعدايعا جەتپەيتىن شىعارمىز دەپ ەدىك. الايدا وكىنىشكە وراي، باسقا امال قالمادى.

ەسكە سالايىق، بىلتىر نيۋ- يورك قالاسىندا مايىتتەردىڭ كوپتىگىنە بايلانىستى اۋرۋحانا جانىندا توڭازىتقىش كامەرالارى بار جۇك كولىكتەرى ورنالاستىرىلعان. وتكەن جىلى كوكتەمدە شاھار كوروناۆيرۋس وشاعىنا اينالعان ەدى.

دۇنيەجۇزىلىك دەنساۋلىق ساقتاۋ ۇيىمىنىڭ وكىلدەرى كەيىنگى ۋاقىتتا سولتۇستىك جانە وڭتۇستىك امەريكادا ۆيرۋس جۇقتىرۋ جانە كىسى ءولىمى دەرەكتەرىنىڭ قايتادان ارتىپ بارا جاتقانىن حابارلادى. وسى رەتتە ا ق ش- تا جاڭا شەكتەۋ شارالارى ەنگىزىلەدى دەپ جوسپارلانعان.

www.24.kz