مەملەكەت باسشىسى «قاز ترانس گاز» ا ق باسقارما ءتوراعاسى قايرات شارىپبايەۆتى قابىلدادى

نۇر-سۇلتان. قازاقپارات - قاسىم-جومارت توقايەۆقا «قاز ترانس گاز» كومپانيالار توبىنىڭ بيىلعى سەگىز ايداعى وندىرىستىك جانە قارجىلىق كورسەتكىشتەرى تۋرالى باياندالدى، دەپ حابارلايدى اقوردا.

قايرات شارىپبايەۆ پرەزيدەنتكە وتكەن جىلمەن سالىستىرعاندا ماگيسترالدى تاسىمالداۋ كورسەتكىشى 14 پايىزعا ءوسىپ، 65,4 ميلليارد تەكشە مەترگە جەتكەنىن مالىمدەدى.

ۇلتتىق وپەراتوردىڭ تابىسى 8 ايدا 6 پايىزعا ارتىپ، 1,342 تريلليون تەڭگە بولدى. تازا پايدانىڭ كولەمى - 55 پايىزعا ءوسىپ، 304 ميلليارد تەڭگەنى قۇرادى.

مەملەكەت باسشىسىنا بيىل وتاندىق گاز تۇتىنۋشىلاردى 158,8 ميلليارد تەڭگەگە سۋبسيديالاۋ شارالارى، سونداي-اق بيۋجەتكە 128,4 ميلليارد تەڭگە كولەمىندە سالىق جانە باسقا دا تولەمدەر تۇسكەنى جونىندە ايتىلدى.

قايرات شارىپبايەۆتىڭ مالىمەتى بويىنشا كومپانيانىڭ تازا تابىسى وتاندىق گاز تاسىمالداۋ جۇيەسىن قالىپتى جاعدايدا ۇستاۋعا جانە بورىشتىق جۇكتەمەسىن ازايتۋعا باعىتتالادى.

«قاز ترانس گاز» ا ق كومپانيالار توبى سەگىز اي ىشىندە 995 ميلليون دوللار كولەمىندەگى كرەديتتىك قارىزىن وتەگەن. مەملەكەت باسشىسىنا گاز تاسىمالداۋ سالاسىنىڭ ينفراقۇرىلىمىن جاڭعىرتۋ جانە دامىتۋ جوبالارىن جۇزەگە اسىرۋ، اتاپ ايتقاندا ماڭعىستاۋ وبلىسىنىڭ گاز تاسىمالداۋ ينفراقۇرىلىمىن رەكونسترۋكتسيالاۋ، «بەينەۋ - بوزوي - شىمكەنت» ماگيسترالدى گاز قۇبىرىنىڭ ەكىنشى جەلىسىن سالۋ، قاشاعانداعى گاز وڭدەۋ زاۋىتتارىنىڭ قۇرىلىسى، سونداي-اق «قاز ترانس گاز» اكسيونەرلىك قوعامىن سيفرلاندىرۋعا باعىتتالعان ءىس-شارالار تۋرالى باياندالدى.

پرەزيدەنت ەلىمىزدى ودان ءارى گازبەن قامتۋعا قاتىستى ۇسىنىلعان جوبالار مەن ءىس-شارالاردى قولدايتىنىن ايتتى.

كەزدەسۋ سوڭىندا قاسىم-جومارت توقايەۆ قايرات شارىپبايەۆقا ەلىمىزدىڭ گاز سالاسىن دامىتۋعا باعىتتالعان ءبىرقاتار مىندەت جۇكتەدى.