اسسامبلەيا مۇشەسى قازاق ءتىلىن ناسيحاتتاۋدىڭ تىڭ ءتاسىلىن ۇسىندى
«ءبىز مەملەكەتتىك ءتىلدى دامىتۋ تۋرالى باستامالاردى قولداي وتىرىپ زاماناۋي فورماتتا جۇمىس ىستەۋىمىز كەرەك. مىسالى، تاتارستاندا جىل سايىن كۇزدە «تاتارشا ديكتانت جاز» اتتى دۇنيەجۇزىلىك اكسيا وتەدى. وعان الەمنىڭ 50 ەلىنەن وكىلدەر قاتىسادى. ءتىلدى ناسيحاتتايتىن بۇل اكسيا بۇكىل الەمگە تارالدى. نەگە ءبىز بۇل تاجىريبەنى قولدانا المايمىز؟ ارينە، بىزدە ءارتۇرلى مەملەكەتتىك ءتىلدى ناسيحاتتايتىن ديكتانتتار وتكىزىلەدى. ءبىراق، ادەتتە، ءبىرىڭعاي اۋقىمدى فورمات جوق. ونداي شارالار الدىن الا حابارلانباي، الەۋمەتتىك جەلىلەردە جارنامالانباي ۇيىمداستىرىلادى. ول ديكتانتتى قازاقستان اۋماعىنان تىس جەرلەرگە دە تاراتۋعا بولادى. قازىر الەمنىڭ كوپتەگەن ەلدەرىندە، اسىرەسە ت م د ەلدەرىندە اباي ورتالىقتارى بار. سولاردىڭ قولداۋمەن وسى جۇمىستى اتقارۋعا بولادى»، - دەدى جاستاردىڭ وكىلى پرەزيدەنت جولداۋىن تالقىلاۋعا ارنالعان دوڭگەلەك ۇستەلدە.
سونداي- اق، ول مەملەكەتتىك ءتىلدىڭ قولدانىس اياسىن كەڭەيتۋدە قازاقستان حالقى اسسامبلەياسىنىڭ جاستارىنا زور مىندەت ارتىلىپ وتىرعانىن جەتكىزدى.
«ءتىل - حالىق جانىن تانۋدىڭ كىلتى. قازاقستاندىقتاردىڭ بىرلىگىن نىعايتۋدىڭ ماڭىزدى فاكتورى رەتىندە مەملەكەتتىك ءتىلدىڭ قوعامداعى ءرولىن ارتتىرۋ ارقىلى ونى ودان ءارى دامىتۋ جانە ناسيحاتتاۋ - اسسامبلەيا جاستارى مىندەتتەرىنىڭ ءبىرى. ءبىز ەرتەڭ اتا- انا بولىپ ءوز بالالارىمىزدىڭ بولاشاعىن ويلاي وتىرا، ولاردىڭ قازاق ءتىلىن بىلۋىنە مۇمكىندىك بەرىپ، قولداۋىمىز كەرەك. مەملەكەت تاراپىنان بۇكىل جاعداي جاسالىپ وتىر»، - دەدى «جاڭعىرۋ جولى» رەسپۋبليكالىق جاستار قوزعالىسىنىڭ مۇشەسى.
ونىڭ ايتۋىنشا، قازاق ءتىلى قازاقستان حالقى بىرلىگىنىڭ بىردەن- ءبىر فاكتورى بولۋعا ءتيىس. «بىزدەر، كوپۇلتتى ەلىمىزدىڭ ازاماتتارى قيىن- قىستاۋ زاماندا ءتۇرلى ۇلتتار مەن ۇلىستاردى باۋىرىنا باسىپ، قۇشاق جايا قارسى العان قاسيەتتى قازاق حالقىنا قارىزدارمىز. سوندىقتان، ەلىمىزدىڭ ءتىلىن مەڭگەرۋ - كوپۇلتتى جاستاردىڭ، قازاقستاندىقتاردىڭ باستى ماقساتى»، - دەدى ەلينا پاۋلي.
اۆتور: ەسىمجان ناقتىباي