ەلورداداعى كىشى تالدىكولدىڭ تاعدىرى نە بولماق - اكىمدىك تۇسىنىك بەردى
«اڭگىمەنى تالدىكول كولى مەن سۋلى- باتپاقتى كىشى تالدىكولمەن شاتاستىرماۋ كەرەكتىگىنەن باستاعىم كەلىپ تۇر. ەلوردانىڭ باس جوسپارىنا سايكەس، قالانىڭ شىعىسىندا ورنالاسقان تالدىكول كولىنىڭ بويىندا كوپقاباتتى تۇرعىن ءۇي سالۋ جوسپارلانىپ وتىر. ارينە تۇرعىن ۇيدەن بولەك، مەكتەپ، بالاباقشا، ەمحانا جانە باسقا دا الەۋمەتتىك نىساندار تۇرعىزىلماق. وسى تۇستا ايتارىم، كولدىڭ وزىنە تيىسپەيمىز، كەرىسىنشە ونىڭ ماڭىنا ءۇي سالىپ، ينفراقۇرىلىمدى دامىتامىز. سول سياقتى باتپاقتى لاس سۋدى تازارتۋدى كولدى جويۋ دەپ تۇسىنەتىن سەكىلدى. بىزدە كولدى جويۋ ماقساتى جوق، كەرىسىنشە ونىڭ لاس باتپاقتان تازارتىپ، ساقتاپ قالماقپىز. سەبەبى ەكولوگيالىق كورسەتكىشتەر بويىنشا ونىڭ سۋلى- باتپاعى لاس ءارى زيان»، - دەدى نۇر- سۇلتان قالاسى ساۋلەت، قالا قۇرىلىسى جانە جەر قاتىناستارى باسقارماسىنىڭ باسشىسى نۇرلان ۇرانحايەۆ ەلوردا اكىمدىگىندە وتكەن باسپا ءسوز ءماسليحاتىندا.
ونىڭ ايتۋىنشا، قازىرگى تاڭدا كىشى تالدىكولدى زاياندى زاتتاردان تازارتۋعا دايىندىق جۇمىسى ءجۇرىپ جاتىر.
«كىشى تالدىكول - باياعىدان باتپاقتى جەر. ونىڭ اۋماعىنا سەلينوگراد كەزىندە كارىز قالدىقتارىن تاستاعان. ەكولوگ رەتىندە ايتارىم، قالانىڭ ىشىندە نەمەسە جاقىن جەردە جاعىمسىز ءيىسى بار وبەكت بولماۋى كەرەك. بۇل تۋرالى ب ۇ ۇ- نىڭ دا ءتيىستى ستاندارتى بار. بۇل جەردە قالا اكىمدىگى كولدى ساقتاپ قالۋدىڭ قامىن جاساپ جاتىر. ياعني، تۇرعىن ءۇيدى سالۋشى كومپانياعا كولدى تازارتىپ، ساقتاپ قالۋ تالابىن قويىپ وتىر. جاساندى باسسەين بولماق، ونىڭ اۋماعى - 20 گەكتار. ونىڭ ۇستىنە ماڭىندا ساياباق بولادى. ەگەر راسىمەن كول تازارتىلىپ، ساقتالىپ قانا قويماي، ونداعى ينفراقۇرىلىم رەتتەلسە، بۇل - سول كولدىڭ بولاشاعى ءۇشىن كۇرەسكەن ەكولوگتاردىڭ جەڭىسى دەپ بىلەمىن»، - دەيدى «بايتاق بولاشاق» رەسپۋبليكالىق قوعامدىق بىرلەستىگىنىڭ پرەزيدەنتى ازاماتحان ءامىرتاي.
ەلوردا ىرگەسىندەگى تالدىكول كولىندە تىرشىلىك ەتەتىن قۇستار مەن وسىمدىكتەر تۋرالى نۇر- سۇلتان قالاسى ساۋلەت، قالا قۇرىلىسى جانە جەر قاتىناستارى باسقارماسىنىڭ باسشىسى نۇرلان ۇرانحايەۆ ايتىپ بەردى.
«كولدىڭ باتپاقتى ەمەس تازا جەرى سول كۇيىندە ساقتالىپ قالادى. جانە جوبا قالانىڭ باس جوسپارىنا ساي ىسكە اسىرىلادى. تاعى ءبىر جايت، بيوسفەرا بىرلەستىگىنىڭ عىلىمي- وندىرىستىك جۇمىسىنا سايكەس كىشى تالدىكول سۋلى- باتپاقتى القاپ، لاس دەپ تانىلعان. كولدى ساقتاپ قالۋ ءۇشىن تازارتۋ جانە باسقا دا جۇمىستار جۇرگىزىلۋى ءتيىس. ويتكەنى كولدىڭ سۋى عانا ەمەس، ونداعى جەراستى سۋى دا لاستانعان. ءبىز تازارتۋ جۇمىسى ارقىلى كولدىڭ ءوزىن عانا ەمەس، ونداعى فلورا مەن فاۋنانى دا ساقتاپ قالعىمىز كەلەدى. بۇگىندە تالدىكولدە قىزىل كىتاپقا ەنگەن 200 شاماسىندا قۇس جانە 90 وسىمدىك ءتۇرى بار»، - دەدى نۇرلان ۇرانحايەۆ ەلوردا اكىمدىگىندە وتكەن باسپا ءسوز ءماسليحاتىندا.
باسقارما باسشىسىنىڭ مالىمدەۋىنشە، كىشى تالدىكولدىڭ سۋلى- باتپاعى - زەرتتەلىپ، دالەلدەنگەن دۇنيە. جانە كولدى تازارتۋداعى ماقسات - ەكولوگيالىق اپاتتىڭ الدىن الۋ.