كوروناۆيرۋسپەن اۋىرعاننان كەيىن ءيىس، ءدام سەزۋ قابىلەتىن قالاي قالپىنا كەلتىرۋگە بولادى
وسى جانە وزگە دە ساۋالدارعا نۇر- سۇلتان قالالىق №8 ەمحانانىڭ پروفيلاكتيكالىق بولىمشەسىنىڭ سكرينينگ دارىگەرى انار اسۋبەكوۆا جاۋاپ بەردى، دەپ حابارلايدى قازاقپارات.
«ەمحانامىزعا وكپەسىن سكرينينگتەن وتكىزەتىن ادام كوپ كەلەدى. ءوز تاجىريبەمدە بايقاعانىم ۆاكسيناتسيادان وتكەن ادام مەن ودان باس تارتقان ادامنىڭ وكپەسىندە ايىرماشىلىق بار. ەكپە الىپ، الايدا كوۆيد ينفەكسياسىن جۇقتىرعان بولسا وكپەسىنە زيان تيمەيدى دەسەم دە بولادى. ءوز باسىم ۆاكسينا العان ادامنىڭ كوپ دەگەندە 10-15 پايىزىنا عانا زاقىم كەلگەنىن بايقادىم. مۇنداي جاعدايدا ناۋقاستىڭ ستاتسيونارعا جاتىپ، كۇندىز- ءتۇنى دارىگەردىڭ باقىلاۋىندا بولۋىنىڭ ەش قاجەتى جوق. ۇيىندە ەمدەلە بەرسە دە بولادى. ال ۆاكسينا الماعان ادام كوروناۆيرۋستىڭ ورتاشا نەمەسە اۋىر ءتۇرىن وتكەرەدى»، - دەدى انار اسۋبەكوۆا ەلوردا اكىمدىگىنىڭ رەسمي سايتىنا بەرگەن سۇحباتىندا.
ءسوزىن جالعاي وتىرىپ، دارىگەر COVID-19 ينفەكسياسىن جۇقتىرعاننان كەيىن ءيىس، ءدام سەزۋ قابىلەتىن ورنىنا قالاي كەلتىرۋگە بولاتىنىن ءتۇسىندىرىپ بەردى.
«كوروناۆيرۋس جۇقتىرعان ناۋقاستىڭ وكپەسىندە قابىنۋ بولعان كەزدە شىرىشتى قاباتىنىڭ ءىسىنۋى پايدا بولادى. سالدارىنان ءيىس سەزۋ جۇيكەسى زاقىمدانعاندىقتان ءبىراز ۋاقىتقا دەيىن ادامدا ءيىس سەزۋ، ءدام سەزۋ ناشارلاپ تۇرادى. ءتىپتى مۇلدەم سەزبەي قالادى. بۇل ءىسىنۋ كەتكەننەن كەيىن اقىرىنداپ قانا ورنىنا كەلەدى. پورتسەستى جىلدامداتۋ ءۇشىن مۇرىندى تۇزدى سۋمەن نەمەسە ارنايى ەرىتىندىلەرمەن كۇندەلىكتى شايىپ وتىرۋ كەرەك. ال ءىسىنۋ ازداپ باسىلعاننان كەيىن حوش ءيىستى زاتتاردى يىسكەپ جۇيكەنىڭ فۋنكسياسىن قايتادان قالپىنا كەلتىرۋگە بولادى»، - دەدى اقحالاتتى دارىگەر.
كوروناۆيرۋس ينفەكسياسىن ەمدەلىپ شىققاننان كەيىن ادام قانشا ۋاقىت كۇتىنۋى قاجەت؟ نەدەن ساقتانۋى كەرەك؟
«الدىمەن كەمىندە ەكى اپتا كارانتين رەجيمىن ساقتاۋى كەرەك. ناقتىراق ايتقاندا، ءوز- ءوزىن كۇتىنىپ، جىلى كيىنۋ، ادام كوپ جينالعان ورىندارعا بارماۋ، باس مەملەكەتتىك سانيتارلىق دارىگەردىڭ قاۋلىسىندا كورسەتىلگەن تالاپتاردى تولىقتاي ساقتاۋ قاجەت. سول سياقتى دۇرىس تاماقتانۋ، ۋاقىتىلى ۇيىقتاۋ، شارشاعانشا جۇمىس ىستەمەۋ كەرەك»، - دەپ ءتۇسىندىردى.
دارىگەر ءوز سوزىندە ناۋقاس ەمدەلىپ شىققاننان سوڭ ۇشاققا وتىرۋ قاۋىپتى ەكەنىن ايرىقشا اتاپ ءوتتى.
«العاشقىدا ينكۋباتسيالىق ۋاقىتتا بىرنەشە كۇننەن 20 كۇنگە دەيىن سوزىلۋى مۇمكىن. كەيىن ايقىن كلينيكالىق بەلگىلەرى بولعاننان كەيىن بىرەر اپتادان ءبىر ايعا دەيىن جالعاسۋى مۇمكىن. ال پ ت ر ناتيجەسى تەرىس بولعاننان كەيىن ۇشۋىنا بولادى. ءبىراق ونىڭ وزىندە دارىگەرىنىڭ رۇقساتىن الۋ قاجەت. سەبەبى بۇل ءار ادامنىڭ ءوز اعزاسىنا بايلانىستى»، - دەدى ول.
انار اسۋبەكوۆا كوروناۆيرۋستان بولەك سوزىلمالى اۋرۋلارى بولسا، ۇشاققا وتىرۋىنا جارتى جىل، ءتىپتى ءبىر جىلعا دەيىن رۇقسات بەرىلمەۋى مۇمكىن ەكەنىن جەتكىزدى.
ايتا كەتەيىك، كوروناۆيرۋس ىندەتىن جۇقتىرعاندار قاتارى ازايعانمەن ەلوردادا «قىزىل» ايماقتان ءالى شىققان جوق. كارانتينگە دەيىنگى قالىپتى ومىرگە ورالۋدىڭ جالعىز جولى - ۆاكسيناتسيا ارقىلى ۇجىمدىق يممۋنيتەتتى دامىتۋ. سول سەبەپتى ءوز دەنساۋلىعىڭىزدى عانا ەمەس وزگەلەردى دە قورعاۋ ءۇشىن ەكپە الۋ قاجەت.