پرەزيدەنت تاپسىرماسى: ەلىمىزدە جاس عالىمدارعا قانداي جاعداي جاسالعان؟
وسى جانە وزگە دە وتاندىق عالىمدار تاقىرىبىنا ارنالعان سۇراقتارعا ق ر ءبىلىم جانە عىلىم مينيسترلىگى عىلىم كوميتەتىنىڭ ءتوراعاسى جاننا قۇرمانعاليەۆا جاۋاپ بەردى، دەپ حابارلايدى قازاقپارات ءتىلشىسى.
«بىلتىر مەملەكەت باسشىسى جولداۋىندا جاس عالىمدارعا ارنالعان جىلىنا كەم دەگەندە 1 مىڭ وقۋ گرانتىن ءبولۋدى تاپسىردى. وسى ورايدا بيىلدان باستاپ PhD عالىمدارعا 3 جىلدىق عىلىم گرانتى قاراستىرىلىپ وتىر. جالپى گرانتتىڭ قۇنى 24 ميلليون تەڭگە ياعني جاس عالىمعا جىلىنا 8 ميلليون تەڭگە بولىنەدى. جانە 1 مىڭ ا ق ش دوللارى كولەمىندە ستيپەنديا تولەنبەك.
گرانتتى ۇتىپ الۋدىڭ ەكى شارتى بار. بىرىنشىدەن، جاس عالىمنىڭ عىلىمي جەتەكشىسى بولۋ كەرەك. ەكىنشىدەن، ۇمىتكەردىڭ شەتەلدىك عىلىمي كونسۋلتانتى بولۋى ءتيىس. ەڭ باستىسى عىلىممەن اينالىسامىن، قازاقستاندىق عىلىمعا ۇلەسىمدى قوسامىن دەگەن تالپىنىسى بولعانى ءجون. ودان بولەك، ءوزىنىڭ عىلىمي تاقىرىبى، يدەياسى بولعانى ابزال»، - دەدى جاننا قۇرمانعاليەۆا و ك ق- دە وتكەن باسپا ءسوز ءماسليحاتىندا.
ونىڭ ايتۋىنشا، سوڭعى ۋاقىتتا وتاندىق جاس عالىمدارعا ەرەكشە نازار اۋدارىلىپ جاتىر.
«بۇگىندە جاس عالىمداردىڭ قاتىسۋىمەن ەلىمىزدە 315 عىلىمي جوبا ىسكە اسىرىلىپ جاتىر، ول ءۇشىن 17,8 ميلليارد تەڭگە قاراستىرىلعان. پرەزيدەنتتىڭ تاعى ءبىر تاپسىرماسى وتاندىق عالىمداردىڭ شەتەلدەن تاعىلىمدامادان ءوتۋى. تاپسىرماعا ساي جىل سايىن 500 قازاقستاندىق عالىم شەتەلدىڭ تانىمال وقۋ ورىندارىنان تاعىلىمدامادان ءوتۋى ءتيىس. بۇگىندە «بولاشاق» باعدارلاماسى ارقىلى 49 وتاندىق جاس عالىم شەتەلدەن تاعىلىمدامادان ءوتۋ مۇمكىندىگىنە يە بولىپ وتىر. سول ءۇردىس جىل سوڭىنا دەيىن جالعاسىن تابادى. وسىلايشا جاس عالىمدارىمىزدىڭ الەمنىڭ كەز- كەلگەن جەرىندە وزىق تاجىريبە الىپ، عىلىممەن اينالىسۋعا مۇمكىندىگى بار»، - دەيدى ول.
سونداي-اق، كوميتەت باسشىسى بيىل 28- قازاندا قازاقستاندىق عالىمداردىڭ شەتەلدەن تاعىلىمدامادان وتۋىنە ارنالعان بايقاۋ وتەتىنىن تىلگە تيەك ەتتى.
بۇعان دەيىن حابارلاعانىمىزداي، ەلىمىزدە 2025-جىلى عالىمداردىڭ سانى 1,5 ەسەگە كوبەيەتىنى ايتىلدى.