اۋعان ازاماتى ون جىل بويى قازاقستان ەلشىلىگىنە ءوزىنىڭ قازاق ەكەنىن دالەلدەي الماي ءجۇر
ەر ادام قازاقستاننان تۋىستارىن تابۋ ءۇشىن جۋرناليستەردەن كومەك سۇراعان.
«انامنىڭ ايتۋىنشا، 20-عاسىردىڭ باسىندا وتارشىلدىق ساياسات كۇشەيگەن كەزدە قازاقتار قىسىمشىلىققا ۇشىراپ، جان-جاققا كەتە باستاعان. سول كەزدەردە كىشى ءجۇزدىڭ تاز رۋىنان شىققان ءبىر اۋىلدىڭ ادامدارى شەتەلگە كوشىپ كەتكەن. اتامنىڭ اكەسى تاشمەت قىرعىزستانعا كوشىپ كەلگەن. ول قايتىس بولعاننان كەيىن ءبىزدىڭ اتامىز شەرمەت جەتىم قالىپ، سول جەردەن اۋعانستانعا كوشكەن. سول جەردە تۇردى. مەن قۇندىز دەگەن جەردە دۇنيەگە كەلدىم»، - دەدى حاميت.
ونىڭ ەكى اعاسى ۋاقىت وتە كەلە يرانعا كوشكەن، ال حاميتتىڭ ءوزى 2002 -جىلى كابۋل ۋنيۆەرسيتەتىنە ءتۇسىپ، تۇرىك ءتىلى مەن ادەبيەتىن وقىپ، سودان كەيىن انكاراداعى گازي ۋنيۆەرسيتەتىندە وقىعان. 2012 -جىلدان باستاپ كابۋل ۋنيۆەرسيتەتىنىڭ شەت تىلدەر فاكۋلتەتىندە تۇرىك تىلىنەن ساباق بەرەدى.
«2010 -جىلى انكارادا بولعان كەزىمدە ق ر ەلشىلىگىنە تاريحي وتانىما ورالۋ تۋرالى ءوتىنىش ءبىلدىردىم. ولار بۇل ءۇشىن اۋعانستانداعى ەلشىلىك جاۋاپ بەرەتىنىن ايتتى. سونداي-اق، قازاق ەكەنىمدى دالەلدەۋ ءۇشىن قازاقستاندا تۋىستارىم بولۋ كەرەك دەپ ايتتى»، - دەدى ەر ادام.
حاميتتىڭ ايتۋىنشا، ول قازاق ءتىلىن ءوز بەتىنشە مەڭگەرگەن.
«مەنىڭ اكەم وسىندا وزبەكتەرمەن ارالاسقاننان كەيىن، سول تىلدە سويلەي باستادى، ءبىراق باسقاشا سويلەيتىن. بىردە مەن ءسوزىمىزدىڭ وزبەك تىلىنەن نەگە ەرەكشەلەنەتىنىن سۇرادىم. انام سول كەزدە، قازاقستاندا تۋعانىمىزدى، اتالارىمىز قيىن كەزەڭدەردە كوشىپ كەلىپ، وسىندا قالعانىن ايتتى. ول كىشى جۇزدەن ەكەنىمىزدى ايتىپ وتىراتىن. سول كەزدە نەگە مەن ءوز تىلىمدە سويلەمەيمىن دەپ قازاق تىلىندە كوپ كىتاپ وقىپ، ءتىلدى ۇيرەنە باستادىم. ول كەزدە مەنىڭ قازاقستانعا كوشۋ تۋرالى ويىم بولعان جوق. انا ءتىلىم بولعاندىقتان، ءتىلىمدى جاقسى كورگەندىكتەن ۇيرەنە باستاعان ەدىم»، - دەدى ول.
«اكەم ەرتە ومىردەن ءوتتى. مەن اناممەن، ايەلىممەن جانە بەس بالاممەن تۇرامىن. ۇلدارىما بىلگە حان، سانجار جانە اتابەك دەگەن قازاق ەسىمدەرىن قويدىم. ەكى جىل بۇرىن قازاقستانعا اسپيرانتۋراعا تۇسكىم كەلگەن. ءبىراق وندا وقۋ اقىسى قىمبات ەكەن. كەيىن مەن بىشكەكتەگى «ماناس« قىرعىز-تۇرىك ۋنيۆەرسيتەتىنە قۇجاتتارىمدى تاپسىرىپ، «تۇركى تىلدەرى« ماماندىعى بويىنشا ونلاين وقىدىم»، - دەپ جالعاستىردى حاميت.
ەر ادام اۋعانستاننىڭ تاحار پروۆينتسياسىندا قازاق دەپ اتالاتىن اۋىل بار ەكەنىن ايتتى.
«مەن وندا تۇراتىن بىرنەشە قازاق وتباسىن بىلەمىن. ولاردىڭ كوپشىلىگى اۋعانستانعا بۇرىن كوشىپ كەلگەندەر. ءبىراق ولار قازاق ءتىلىن بىلمەيدى. ۇيرەنەيىن دەسە مۇعالىم جوق ەكەنىن ايتادى»، - دەيدى.
حاميتتىڭ ايتۋىنشا، اۋعانستان قازىر تولىعىمەن تالىپتەردىڭ باقىلاۋىندا.
«ۇكىمەت جوق، حالىقتىڭ جاعدايى ناشار. قالاعا كىرەتىن جولدار جابىق، ازىق- تۇلىك يمپورتتالمايدى. بانكتەر دە جابىق، سوندىقتان ادامدار جالاقى المايدى. مەن جۇمىس ىستەگەن كابۋل ۋنيۆەرسيتەتى دە جابىلدى. تالىپتەردەن جاقسى ەشتەڭە كۇتىپ وتىرعان جوقپىز. بويىمىزداعى قاۋىپ كۇن وتكەن سايىن كوبەيىپ جاتىر. وسى جەردەن تاريحي وتانىمىزعا كەتكىمىز كەلەدى»، - دەدى ول.
باسىلىم حاميت قازاقستانعا كوشۋ ءۇشىن قازاقستاندا تۋىستارىن تاۋىپ، ەلشىلىككە ونىڭ قازاق ەكەنىن دالەلدەۋى كەرەك دەدى. ول كىشى ءجۇزدىڭ باي ۇلى تايپاسىنىڭ تازى رۋىنان شىققانىن بىلەدى. اكەسى - شارافۋددين، اتاسى- شەرمەت، ۇلكەن اتاسى - تاشمەت.