شىنايى وقيعاعا نەگىزدەلگەن كەڭ اۋقىمدى تاريحي كينوجوبادا ەكىنشى دۇنيەجۇزىلىك سوعىستان كەيىن تۇتقىنعا تۇسكەن جاپونيانىڭ اسكەري ۋچيليشەنىڭ كۋرسانتى احيكو تەتسۋرونىڭ ءومىر جولى مەن تاعدىرى باياندالادى.
فيلمنىڭ رەجيسسەرى - ەلدار قاپاروۆ. الماتى وبلىسى قاراساي اۋدانى دولان اۋىلىنىڭ ماڭىندا ءتۇسىرىلىپ جاتقان تاريحي كينو تۋىندىدا باستى رولدەردى سىرىم قاشقابايەۆ (قازاقستان) جانە ەيساكۋ وگاساۆارا (جاپونيا) سومدايدى.
ال پروديۋسەرى - «ستالينگە سىيلىق» (رەج. رۇستەم ءابدىراشوۆ) جانە «جاۋجۇرەك مىڭ بالا» (رەج. اقان ساتايەۆ) فيلمدەرى ارقىلى تانىلعان ءاليا ءۋالجانوۆا.
- احيكو تەتسۋرو تۋرالى فيلمدى ءتۇسىرۋ يدەياسى وسىدان بىرنەشە جىل بۇرىن پايدا بولدى. ونىڭ قيلى تاعدىرىن ەستىپ بىلگەن سوڭ، ونىمەن تانىسىپ، كەيىنگى ءومىرى تۋرالى بىلگىم كەلدى. سول ماقساتپەن 2007 -جىلى قاراعاندى وبلىسى اقتاس اۋىلىنا بارىپ، احيكو تەتسۋرومەن تانىستىم. ول تۋرالى دەرەكتى فيلمدى دە تۇسىردىك. ول ءوز تاعدىرى تۋرالى ەگجەي- تەگجەي بايانداپ بەردى. وسىلايشا كوركەم فيلمنىڭ سسەناريى دۇنيەگە كەلدى، - دەدى فيلمنىڭ پروديۋسەرى ءارى تەڭ رەجيسسەرى ءاليا ءۋالجانوۆا.
ايتا كەتسەك، «اقتاستاعى احيكو» كوركەم فيلمى 2019 -جىلدىڭ باسىندا وندىرىسكە جىبەرىلگەن، دەگەنمەن پاندەمياعا بايلانىستى فيلمنىڭ تۇسىرىلىمدەرى ۋاقىتشا توقتاتىلعان ەكەن. ق ر مادەنيەت جانە سپورت مينيسترلىگى تاپسىرىسى بويىنشا ءتۇسىرىلىپ جاتقان بۇل فيلم 2022 -جىلدىڭ سوڭىندا قالىڭ كورەرمەندەرگە ۇسىنىلاتىن بولادى.
www.24.kz