حالىقارالىق پاندىك وليمپيادا جەڭىمپازدارىنا قانشا سىياقى بەرىلەدى - ءبىلىم ءمينيسترى

نۇر-سۇلتان. قازاقپارات - ق ر ءبىلىم جانە عىلىم ءمينيسترى اسحات ايماعامبەتوۆ حالىقارالىق پاندىك وليمپيادالار جەڭىمپازدارىنا قانشا سىياقى بەرىلەتىنىن ءتۇسىندىردى، دەپ حابارلايدى قازاقپارات.

«مەملەكەت باسشىسى الەۋمەتتىك وسال توپتاعى بالالاردى قولداۋعا ەرەكشە كوڭىل ءبولدى. ولارعا «سيفرلىق تالىمگەر» جوباسى اياسىندا قوسىمشا ساباقتار الۋ مۇمكىندىگى بەرىلەدى. قاشىقتان وقىتۋعا قاراماستان، ءبىزدىڭ وقۋشىلارىمىز الەمدىك شىڭداردى باعىندىرىپ، حالىقارالىق وليمپيادالاردا وتكەن جىلدارداعى رەكوردتارىن جاڭارتتى. دارىندى بالالاردى قولداۋ ءۇشىن پرەزيدەنتتىڭ تاپسىرماسىنا سايكەس كونكۋرسقا قاتىسپاي-اق گرانتتار بەرۋ، سونداي-اق ءبىرجولعى اقشالاي سىياقىلار كوزدەلەتىن بولادى: التىن مەدال ءۇشىن كەمىندە 1500 ا ە ك، كۇمىس مەدال - 1000 ا ە ك، قولا مەدال - 500 ا ە ك ۇسىنىلادى. سونىمەن بىرگە حالىقارالىق وليمپيادالاردىڭ جۇلدەگەرلەرىن دايىنداعان پەداگوگتەردى قولداۋ شارالارى كوزدەلەدى»، - دەپ جازدى مينيستر Facebook جەلىسىندە.

ال «جاس تالاپ» جوباسىنا سايكەس، سۇرانىسقا يە ماماندىقتار بويىنشا جاستارعا تەحنيكالىق جانە كاسىپتىك ءبىلىم الۋ ءۇشىن كوللەدجدەردە تەگىن وقىتۋ مۇمكىندىگى كەڭەيتىلەدى.

«پرەزيدەنت تولىق جيناقتالعان اۋىل مەكتەپتەرىن جان باسىنا شاققانداعى قارجىلاندىرۋعا كەزەڭ-كەزەڭمەن كوشىرۋ جونىندە شارا قابىلداۋدى تاپسىردى. ەستەرىڭىزگە سالا كەتەيىن، 2020-جىلدان باستاپ بارلىق قالالىق مەكتەپ جان باسىنا قارجىلاندىرۋعا كوشتى. بۇل شارا ءتۇرلى وڭىرلەردە قارجىلاندىرۋدى تەڭەستىرۋ، ماتەريالدىق-تەحنيكالىق بازانى جاقسارتۋ، الىم-سالىقتارمەن بايلانىستى تاۋەكەلدەردى ەداۋىر تومەندەتۋ، مەكتەپتەردىڭ قارجىلىق دەربەستىگىن ارتتىرۋ جانە بيۋجەت قاراجاتىن جۇمساۋ تيىمدىلىگىن جاقسارتۋعا مۇمكىندىك بەردى. بۇل باستاما ءبىلىم بەرۋ جانە جەكەمەنشىك مەكتەپتەر اشۋعا جەكە ينۆەستيتسيالاردى تارتۋدى ىنتالاندىردى»، - دەپ جازدى ا. ايماعامبەتوۆ.

ايتا كەتەيىك، مەملەكەت باسشىسى قاسىم-جومارت توقايەۆ قازاقستان حالقىنا جولداۋىندا حالىقارالىق پاندىك وليمپيادالاردا جەڭىمپاز جانە جۇلدەگەر بولعان وقۋشىلارعا بىررەتتىك اقشالاي سىياقى بەرۋدى تاپسىردى.

«وسى جىلى بىرنەشە قازاقستاندىق وقۋشى حالىقارالىق پاندىك وليمپيادالاردا جەڭىمپاز جانە جۇلدەگەر بولدى. مۇنداي تالانتتى بالالاردا بارىنشا قولداۋ قاجەت. ءبىز ولارعا جوعارى وقۋ ورىندارىنا كونكۋرستان تىس ءتۇسۋى ءۇشىن گرانتتار ۇسىنىپ، بىررەتتىك اقشالاي سىياقى تولەيتىن بولامىز. بالالاردى تارتبيەلەگەن پەداگوگتاردى دا مورالدىك جانە ماتەريالدىق تۇرعىدا كوتەرمەلەۋ قاجەت»، - دەدى قازاقستان پرەزيدەنتى.