مىڭ مەكتەپ سالۋ تاپسىرماسى قالاي جۇزەگە اسادى - اسحات ايماعامبەتوۆ
مينيستر پرەزيدەنتتىڭ ءبىلىم جانە عىلىم سالاسى بويىنشا دا ءبىرقاتار ماڭىزدى ءارى وزەكتى مىندەتتەر جۇكتەگەنىن اتاپ ءوتتى.
«پرەزيدەنت جولداۋىندا كوزدەلگەن تاپسىرمالاردىڭ ۋاقىتىلى جانە ساپالى ورىندالۋىن قامتاماسىز ەتۋ ءۇشىن بارلىق قاجەتتى شارا قابىلداناتىن بولادى. جولداۋدا ايتىلعانداي، ۋربانيزاتسيا جانە دەموگرافيالىق پروتسەستەرگە بايلانىستى 2025-جىلى مەكتەپتەردە قوسىمشا شامامەن 1 ميلليون ورىن قاجەت بولادى. بۇل ماسەلەنى شەشۋ ءۇشىن مىڭ جاڭا مەكتەپ سالىنادى. وسى جىلدىڭ وزىندە 200 مەكتەپتى اشۋ جوسپارلانىپ وتىر. اكىمدىكتەرمەن بىرلەسىپ، 4 تەتىك پايدالانىلادى. اتاپ ايتقاندا، مەملەكەتتىك-جەكەمەنشىك ارىپتەستىك، جەكە مەكتەپتەر جەلىسىن دامىتۋ، مەملەكەتتىك بيۋجەتتەن نىسانالى قۇرىلىس جانە مودۋلدىك كونسترۋكسيالاردان مەكتەپتەر سالۋ»، - دەپ جازدى مينيستر Facebook جەلىسىندە.
ونىڭ ايتۋىنشا، وقۋشىلار بىلىمىندەگى ولقىلىقتاردىڭ ورنىن تولتىرۋ جانە وقۋ باعدارلامالارىن بەيىمدەۋ بويىنشا شارالار جوسپارلانعان. سونىمەن قاتار 5 مىڭ مەكتەپتى مودەرنيزاتسيالاۋ، پاندىك كابينەتتەرمەن جابدىقتاۋ، قوسىمشا ءبىلىم بەرۋگە مەملەكەتتىك تاپسىرىس ءبولۋ جوسپاردا بار.
«پەداگوگتەردىڭ بىلىكتىلىگىن ارتتىرۋعا ەرەكشە نازار اۋدارىلادى. الەم قارىشتاپ دامىپ كەلە جاتقاندا بۇل وتە ماڭىزدى. مۇعالىمدەردىڭ بىلىكتىلىگىن قازىرگىدەي بەس جىلدا ءبىر رەت ەمەس، ءۇش جىلدا كەمىندە ءبىر رەت ارتتىرۋ كوزدەلەتىن بولادى. پرەزيدەنت سونداي-اق پەداگوگتەردى تەگىن كۋرستارمەن تولىق قامتاماسىز ەتۋ قاجەتتىگى تۋرالى مالىمدەدى»، - دەيدى ا. ايماعامبەتوۆ.
ايتا كەتەيىك، مەملەكەت باسشىسى بيىلعى جولداۋىندا 2025-جىلعا دەيىن ەلىمىزدە 1000 مەكتەپ سالۋ مىندەتىن قويدى.