مۇعالىمدەردى قولداۋ ساياساتىن جالعاستىرا بەرەمىز – پرەزيدەنت

نۇر- سۇلتان. قازاقپارات - مۇعالىمدەردى قولداۋ ساياساتىن جالعاستىرا بەرەمىز. بۇل تۋرالى مەملەكەت باسشىسى قاسىم- جومارت توقايەۆ قازاقستان حالقىنا جولداۋى بارىسىندا ايتتى، دەپ حابارلايدى قازاقپارات ءتىلشىسى.

«وسى جىلدىڭ قاڭتارىنان باستاپ پەداگوگيكا قىزمەتكەرلەرىنىڭ جالاقىسى 25 پايىزعا ءوستى. الداعى ءۇش جىلدىڭ ىشىندە ءبىز بۇل ماقساتقا قوسىمشا 1,2 تريلليون تەڭگە باعىتتايمىز. قابىلدانعان ءىس- شارالار ءوز جەمىسىن بەرىپ تە جاتىر. پەداگوگيكا ماماندىعىنا تۇسۋشىلەردىڭ ورتاشا باللى كۇرت ءوستى. مۇعالىمدەردى قولداۋ ساياساتىن جالعاستىرا بەرەتىن بولامىز»، - دەدى ق ر پرەزيدەنتى.

سونىمەن قاتار، مەملەكەت باسشىسى جاھاندىق وزگەرىستەر جاعدايىندا العان ءبىلىم تۇلەك ەڭبەك نارىعىنا شىققانشا ەسكىرىپ كەتۋ مۇمكىندىگى جوعارى ەكەندىگىن باسا ايتتى.

«سوندىقتان بەيىندى مينيسترلىكتەردىڭ الدىندا وقۋ باعدارلامالارىن جاڭا جاعدايلارعا بەيىمدەۋ بويىنشا شۇعىل مىندەت تۇر. پاندەميا كەزىندەگى قاشىقتان وقىتۋ قورىتىندىسى ۇلتتىق تەلەكوممۋنيكاتسيا جەلىسى تيىمدىلىگىنىڭ جەتكىلىكسىزدىگىن كورسەتتى. بۇل بازالىق قاراپايىم ءبىلىمى جوق وقۋشىلاردىڭ ۇلكەن لەگىنىڭ پايدا بولۋىنا الىپ كەلدى»، - دەدى قاسىم- جومارت توقايەۆ.

پەداگوگتاردىڭ بىلىكتىلىك كۋرستارىن ءوز قاراجاتى ەسەبىنەن وتۋىنە جول بەرمەۋ قاجەت. بۇل تۋرالى مەملەكەت باسشىسى قاسىم- جومارت توقايەۆ قازاقستان حالقىنا جولداۋى بارىسىندا ايتتى.

«ءبىلىم بەرۋ جۇيەسىنە ىنتالى جانە بىلىكتى پەداگوگتار قاجەت. مۇعالىمدەردى قايتادان وقىتۋدى 5 جىلدا ەمەس 3 جىلدا ءبىر رەت وتكىزۋ تالاپ ەتىلەدى دەپ ويلايمىن. ويتكەنى، ولار جاڭا ءبىلىمدى تاسىمالداۋشى، ناعىز اعارتۋشى بولۋى ءتيىس. بۇعان قوسا، پەداگوگتاردىڭ كۋرستاردى ءوز قاراجاتى ەسەبىنەن وتۋىنە جول بەرمەۋ قاجەت»، - دەدى مەملەكەت باسشىسى.

اۆتور: مارلان جيەمباي