پرەزيدەنت جولداۋى: مەملەكەت شاعىن جانە ورتا بيزنەسكە قانداي قولداۋ كورسەتتى
ۇلتتىق ەكونوميكا مينيسترلىگىنىڭ حابارلاۋىنشا، بيىل شاعىن جانە ورتا بيزنەستى جەڭىلدىكپەن كرەديتتەۋ جۇمىستارى «بيزنەستىڭ جول كارتاسى 2025»، «قاراپايىم زاتتار ەكونوميكاسى»، «ەڭبەك» جانە «جۇمىسپەن قامتۋدىڭ جول كارتاسى» باعدارلامالارى، سونداي-اق اينالىم كاپيتالىن تولىقتىرۋعا ۇلتتىق بانكتىڭ جەڭىلدىكپەن كرەديتتەۋ باعدارلاماسى شەڭبەرىندە جالعاسۋدا.
اتاپ ايتقاندا، كرەديتتەر بويىنشا جىلدىق مولشەرلەمە %6 دى قۇرايدى، اينالىم كاپيتالىن تولىقتىرۋدى قارجىلاندىرۋ مەن كرەديتتەر سوماسى ۇلعايتىلدى، ميكرو جانە شاعىن كاسىپكەرلىك سۋبەكتىلەرىنە قولجەتىمدى ميكروكرەديت بەرۋ ىسكە قوسىلدى.
ۆەدومستۆو ۇسىنعان اقپاراتقا سايكەس، بيىلعى ءبىرىنشى جارتىجىلدىقتا 31 مىڭنان استام جوبا 1 تريلليون تەڭگەدەن استام سوماعا جەڭىلدىكتى قارجىلاندىرۋ العان. ەكونوميكانىڭ زارداپ شەككەن سەكتورلارىنداعى كاسىپكەرلەردى قولداۋ ءۇشىن شاعىن جانە ورتا كاسىپكەرلىك كرەديتتەرى قايتا قارجىلاندىرىلۋدا.
ەكونوميكالىق قىزمەت تۇرلەرىنىڭ تىزبەسى كەڭەيتىلىپ، سۋبسيديالاۋ مەرزىمى 3 ايعا ۇزارتىلدى. وسى شارالارعا بيۋجەتتەن 18,4 ميلليارد تەڭگە بولىنگەن.
بيىلعى شىلدە ايىندا «بيزنەستىڭ جول كارتاسى» جانە «قاراپايىم زاتتار ەكونوميكاسى» باعدارلامالارى شەڭبەرىندە جاڭا بيزنەس جوبالارىن سۋبسيديالاۋ ءۇشىن بيۋجەتتەن قوسىمشا 13,2 ميلليارد تەڭگە ءبولىندى.
ەكى باعدارلامانى قارجىلاندىرۋدىڭ جالپى كولەمى 186,3 ميلليارد تەڭگە بولدى. سونىمەن بىرگە، شىلدە ايىندا «جۇمىسپەن قامتۋدىڭ جول كارتاسى» باعدارلاماسى اياسىندا «باستاۋ-بيزنەس» جوباسىنىڭ تۇلەكتەرىنە شاعىن نەسيە بەرۋ باستالدى.
وعان 22,5 ميلليارد تەڭگە ءبولىندى. اۋىلداعى ءوز كاسىبىن جاڭادان باستايتىن كاسىپكەرلەردىڭ 5 مىڭداي جوباسىن قارجىلاندىرۋ جوسپارلانۋدا. سونىمەن بىرگە، ءبىرىنشى جارتىجىلدىق قورىتىندىسى بويىنشا «بيزنەستىڭ جول كارتاسى 2025» جانە «قاراپايىم زاتتار ەكونوميكاسى» باعدارلامالارى اياسىندا جالپى سوماسى 441 ميلليارد تەڭگەگە 12447 جوبا سۋبسيديالاندى.
187 ميلليارد تەڭگە بولاتىن 10 788 جوباعا كەپىلدىك بەرىلدى. اگرارلىق نەسيە كورپوراتسياسى شەڭبەرىندە 5,9 ميلليارد تەڭگە بولاتىن 134 جوباعا قولداۋ كورسەتىلدى.
جىل باسىنان بەرى نەسيەلەردى سۋبسيديالاۋ قۇرالى بويىنشا ەڭ كوپ قولداۋ كورسەتىلگەن جوبالار نۇر-سۇلتان، الماتى قالالارىندا جانە جامبىل وبلىسىندا بايقالدى. كەپىلدىك بەرۋ قۇرالى بويىنشا جوبالاردىڭ باسىم بولىگى جامبىل، تۇركىستان وبلىستارىندا جانە نۇر-سۇلتان قالاسىندا قولداۋ تاپتى.
«اتامەكەن» ۇلتتىق كاسىپكەرلەر پالاتاسى 50 مىڭنان استام كاسىپكەرلىك سۋبەكتىلەرىنە ساۋالناما جۇرگىزىپ، شاعىن جانە ورتا بيزنەستى قولداۋ بويىنشا جاڭا شارالار پاكەتىن ازىرلەدى.
اتاپ ايتقاندا، 2021-جىلعا ارنالعان ەكونوميكالىق ءوسۋدى قالپىنا كەلتىرۋ بويىنشا وزەكتى كەشەندى جوسپار ىسكە اسىرىلۋدا. بۇل كەشەندى جوسپار 60 تان استام قولداۋ شارالارىن ىسكە اسىرۋدى، ونىڭ ىشىندە بيزنەسكە جۇكتەمەنى ازايتۋ، سۇرانىس نارىقتارىنا قولجەتىمدىلىكتى قامتاماسىز ەتۋ، جاڭا رەتتەۋشىلىك ساياساتتى ەنگىزۋدى كوزدەيدى.
بيىلعى 1- قاڭتاردان باستاپ، زارداپ شەككەن سالالاردا تۇسكەن تابىستىڭ 3 پايىز مولشەرلەمەسىمەن بولشەك سالىقتىڭ جاڭا ارنايى رەجيمى ەنگىزىلدى. ال 1- ساۋىردەن 1- شىلدەگە دەيىن ەڭبەكاقى تولەۋ قورىنان زارداپ شەككەن سالالاردا سالىقتاردى تولەۋدى كەيىنگە قالدىرۋ ۇسىنىلدى.
1- شىلدەدەن باستاپ جاڭادان قۇرىلعان وندىرىستىك كومپانيالار ءۇشىن 70 پايىز مولشەرىندە قوسىلعان قۇن سالىعى بويىنشا قوسىمشا ەسەپكە الۋ قۇقىعى بەرىلدى.
ۇسىنىلعان قورعاۋ قۇرالدارىنىڭ قۇنى ارقىلى كاسىپكەرلىك سۋبەكتىلەرىنىڭ قىزمەتكەرلەرى جەكە تابىس سالىعىنان بوساتىلدى. سونىمەن بىرگە، كەلەسى جىلدان باستاپ بيزنەستى جاڭا نەگىزگى قورلارعا قايتا ينۆەستيتسيالاۋعا پايدالانىلاتىن كورپوراتيۆتىك تابىس سالىعىنان بوساتۋ جونىندەگى شارالار كوزدەلگەن.
بيزنەسكە جۇكتەمەنى تۇبەگەيلى تومەندەتۋ، وڭتايلى جانە ءتيىمدى رەتتەگىش جۇيەنى قالىپتاستىرۋ ماقساتىندا كاسىپكەرلىك قىزمەتتى «تازا پاراقتان» رەتتەۋ تاسىلدەرى جاسالۋدا.
ولار مەملەكەت پەن كاسىپكەرلىكتىڭ ءوزارا ءىس-قيمىلىنىڭ بازالىق قاعيداتتارىن جەتىلدىرۋدى كوزدەيدى. قازىرگى ۋاقىتتا ءتيىستى زاڭ جوباسى پارلامەنتتە قارالۋدا.