اتىراۋعا توكيو پاراليمپياداسىنىڭ كۇمىس جۇلدەگەرلەرى كەلدى
بۇگىن، 31- تامىزدا اتىراۋلىقتار توكيوداعى پاراليمپيادا ويىندارىندا دزيۋدودان كۇمىس جۇلدەگە يە بولعان دزيۋدوشىلار ءانۋار ساريەۆ، داۋلەت تەمىرجان مەن زارينا بايباتينانى قوشەمەتپەن كۇتىپ الدى.
«پاراليمپياداعا التىن مەدال الۋ ءۇشىن بارعان ەدىم. جەڭىسكە جەتۋ ءۇشىن باپكەرىمنىڭ كەڭەسىن، ءوزىمنىڭ تاجىريبەمدى تولىق پايدالانۋعا تىرىستىم. ءبىراق، ءسال ساتتىلىك جەتىسپەدى. ەندى پاريجدە پاراليمپياداعا دايىندىقتى باستايمىن. سول كەزدە ەلىمىزدىڭ كوك بايراعىن جەلبىرەتىپ، ءانۇرانىن شىرقاتۋعا تىرىسامىن»، - دەيدى پاراليمپيادا ويىندارىنىڭ كۇمىس جۇلدەگەرى ءانۋار ساريەۆ.
پارادزيۋدودان ەل قۇراماسىنىڭ باس باپكەرى جاندوس قيانوۆتىڭ ايتۋىنشا، ءانۋار ساريەۆ - الەمدىك رەيتينگتە العاشقى ۇشتىككە ەنگەن تاتامي شەبەرى.
«سول سەبەپتەن، ءبىرىنشى اينالىمدا ءانۋاردىڭ قارسىلاسى بولمادى. ەكىنشى كەزەڭدە موڭعول سپورتشىسىن جارتىلاي جەڭىسپەن ۇتتى. سول كەزدەسۋدە ازداعان جاراقات الدى. مۇرنى سىنىپ، ساۋساعىن اۋىرتىپ الدى. سوعان قاراماستان، كەلەسى اينالىمدا ۆەنەسۋەلالىق ماركوس بلانكومەن كۇرەسىپ، ونى ەكى ادىسپەن جەڭدى. ال، فينالدا ازەربايجاندىق ۆۋگار شيرينليمەن كەزدەسۋدە قاتەلىك جىبەرىپ الدى. قارسىلاسى سونى پايدالانىپ كەتتى»، - دەيدى جاندوس قيانوۆ.
ەسكە سالا كەتەلىك، بۇدان بۇرىن پاراليمپيادا قازاقستاندىق دزيۋدوشى ءانۋار ساريەۆ، ودان سوڭ داۋلەت تەمىرجان، كەيىن زارينا بايباتينا كۇمىس جۇلدەگەر اتانعان ەدى.