قازاقستانداعى بارلىق وق- دارىلەردىڭ ساقتالۋىن تەكسەرەتىن كوميسسيا قۇرىلدى

نۇر- سۇلتان. قازاقپارات - قورعانىس مينيسترلىگىندە قارۋلى كۇشتەردىڭ بارلىق وبەكتىلەرىندەگى وق- دارىلەردىڭ ساقتالۋ جاعدايىن تەكسەرۋ جونىندە كوميسسيا قۇرىلدى.

بۇل تۋرالى قازاقپارات ق م سىلتەمە جاساپ حابارلايدى.

قورعانىس ۆەدومستۆو باسشىسى ن. ەرمەكبايەۆتىڭ بۇيرىعىمەن قورعانىس مينيسترلىگى باس ينسپەكسياسىنىڭ باستىعى گەنەرال- لەيتەنانت ءامىر حالىقوۆ باسشىلىق ەتەتىن قارۋلى كۇشتەردىڭ بارلىق قويمالارىنداعى وق- دارىلەردى تەكسەرۋ كوميسسياسىنىڭ قۇرامى تاعايىندالدى. شەشىم جامبىل وبلىسىندا ورىن العان وقيعاعا بايلانىستى قابىلداندى.

العاشقى ساتتەن باستاپ- اق قورعانىس ءمينيسترى ءورت سالدارىن جويۋ جۇمىستارىن ۇيىمداستىرىپ، وقيعانىڭ تۋىنداۋ سەبەپتەرى مەن ءمان- جايىن تالدادى. اپپارات كەڭەسىندە گەنەرال- لەيتەنانت ن. ەرمەكبايەۆ اتاپ وتكەندەي، قورعانىس مينيسترلىگى ارىستا بولعان ورتتەن كەيىن بۇنداي وقيعالاردى بولدىرماۋ ءۇشىن كەشەندى شارالار قابىلداعان بولاتىن. سونداي- اق قارۋلى كۇشتەردە قارۋ- جاراق پەن وق- دارىلەردى ساقتاۋ وبەكتىلەرىن جەتىلدىرۋ بويىنشا كەشەندى جوسپار جۇزەگە اسىرىلىپ، 30 جىل ىشىندە العاش رەت وق- دارىلەرگە تولىق تۇگەندەۋ جۇرگىزىلدى جانە ەكى ساقتاۋ بازاسىنىڭ قۇرىلىسى ۇيىمداستىرىلدى.

«قابىلدانعان شارالارعا قاراماستان، مينيستر بەرگەن ءبىرقاتار تاپسىرمالاردىڭ ءوز دەڭگەيىندە ورىندالماۋى جامبىل وبلىسىنداعى وقيعانىڭ سەبەبى بولۋى دا مۇمكىن. وقيعانىڭ شىنايى سەبەپتەرى مەن كىنالىلەردى تەرگەۋ جۇمىستارى انىقتاۋى ءتيىس»، - دەدى قورعانىس ۆەدومستۆوسىنىڭ باسشىسى.

وق- دارىلەردى ساقتاۋ وبەكتىلەرى رەجيمدىك ەكەنىن ەسكەرە وتىرىپ، كوميسسيا جۇمىسىنا كەڭەسشىلەر رەتىندە تاۋەلسىز جانە بىلىكتى ساراپشىلاردى، ونىڭ ىشىندە قارۋلى كۇشتەردىڭ ارداگەرلەرىن تارتۋ تاپسىرىلدى.

كوميسسيا وق- دارىلەردىڭ ساقتاۋ جاعدايىنا وبەكتيۆتى باعا بەرىپ، بارلىق كەمشىلىكتەردى انىقتاۋعا جانە ولاردى جويۋ جونىندەگى جۇمىستاردى ۇيىمداستىرۋعا ىقپال ەتەدى.

ەستەرىڭىزگە سالا كەتسەك، 26 - تامىزدا ساعات شامامەن 19:00-دە جامبىل وبلىسىنىڭ بايزاق اۋدانىندا ورنالاسقان اسكەري ءبولىم قويمالارىنىڭ بىرىنەن ءورت شىعىپ، جويقىن جارىلىس بولدى. سوڭعى مالىمەت بويىنشا، جامبىل وبلىسىنداعى جارىلىستان 15 ادام قازا تاپقان. ق ر پرەزيدەنتى قاسىم- جومارت توقايەۆ 29 -تامىزدى جالپى ۇلتتىق ازا تۇتۋ كۇنى دەپ جاريالادى.

27 -تامىزدا مەملەكەت باسشىسى قاسىم- جومارت توقايەۆ اتالمىش توتەنشە جاعداي بويىنشا شۇعىل جينالىس وتكىزىپ، ۆەدومستۆوارالىق مەملەكەتتىك كوميسسيا قۇرۋدى تاپسىردى. سونداي- اق، ول باس پروكۋراتۋرا مەن ىشكى ىستەر مينيسترلىگىنە جامبىل وبلىسىنداعى وقىس وقيعانىڭ ءمان- جايىن جانە كىنالىلەردى انىقتاۋ ءۇشىن سوتقا دەيىنگى تەرگەۋ امالدارىن مۇقيات جۇرگىزۋدى جۇكتەدى.