«قىزاناقتى اس رەتىندە پايدالانعاندا ول اسقازاندا ىدىراپ، انتيدەنە تۇزەدى. تاجىريبە اياسىندا بىزدەر وزبەكستاندا تابىلعان كوروناۆيرۋستى الىپ، ونىڭ ءبىر بولىگىن كلونداپ، وسىمدىك جاسۋشاسىنا ەنگىزۋ ارقىلى تەكسەرىپ كوردىك. ناتيجەسىندە ۆاكسينا شىنىمەن وسىمدىك جاسۋشاسىنان بولىنۋدە»، - دەيدى ورتالىق ديرەكتورى زابارداست بۋرييەۆ.
ونىڭ ايتۋىنشا، ازىق- تۇلىكپەن ۆاكسينا جاساۋ تاجىريبەسى رەسەي مەن كانادادا ءسۇت پەن جۇگەرى سياقتى ونىمدەردە قولدانىلۋدا. ولاردىڭ كلينيكالىق سىناقتارى دا اياقتالۋعا جاقىن. ورتالىق ديرەكتورىنىڭ مالىمەتىنە قاراعاندا، قىزاناقتا سينتەزدەلگەن كوروناۆيرۋستىڭ S- اقۋىزى اسقازان ارقىلى ىشەككە ەنىپ، يممۋندىق جۇيەنى وياتادى. وسىلايشا پايدا بولعان انتيدەنەلەر قوزدىرعىشپەن كۇرەسە باستايدى. مۇنداي ۆاكسينالار بالالار ءۇشىن وتە قولايلى.
قازىرگى كەزدە ۆاكسينا زەرتحانادا ءپىسۋ پروتسەسىندە. سودان كەيىن ونى تىشقان، قويان جانە ەگەۋقۇيرىق سىندى جانۋارلاردا سىناقتان وتكىزىلىپ، ناتيجەلەرى تالدانادى. جوسپار بويىنشا سىناقتاردىڭ بيىل اياقتالۋى كوزدەلگەن.
مامانداردىڭ ايتۋىنشا، قازىر كوروناۆيرۋسقا قارسى ۆاكسينا كانادادا تەمەكى مەن جۇگەرىدەن، ال رەسەيدە بيوكەفيردەن، ياعني ءسۇت ونىمدەرىنەن الىنادى. ۆاكسينالىق ءونىم اسقازان ارقىلى ىشەككە وتەدى جانە ىشەكتە انتيدەنەلەردىڭ ءسىڭۋى ناتيجەسىندە ورگانيزمدە يممۋندىق جۇيەنىڭ جۇمىسىنا بايلانىستى كوروناۆيرۋسقا قارسى يممۋنيتەت پايدا بولادى.