ۇكىمەتتىك كوميسسيا جامبىل وبلىسىندا بولعان ءورت پەن جارىلىس زاردابىن باعالايدى
18:37, 27 - تامىز 2021
نۇر-سۇلتان. قازاقپارات - مەملەكەت باسشىسى قاسىم-جومارت توقايەۆتىڭ تاپسىرماسىن ورىنداۋ اياسىندا ق ر پرەمەر-ءمينيسترى اسقار ماميننىڭ وكىمىمەن 26- تامىزدا جامبىل وبلىسىنىڭ بايزاق اۋدانىنداعى وق-ءدارى قويماسىندا ورىن العان ءورت پەن جارىلىس سالدارىن جويۋ جونىندەگى ۇكىمەتتىك كوميسسيا قۇرىلدى.
بۇل تۋرالى قازاقپارات ۇكىمەت باسشىسىنىڭ رەسمي سايتىنا سىلتەمە جاساپ حابارلايدى.
ق ر پرەمەر-ءمينيسترىنىڭ ورىنباسارى رومان سكلياردىڭ توراعالىعىمەن كوميسسيا قۇرامىنا جامبىل وبلىسىنىڭ اكىمى بەردىبەك ساپاربايەۆ، قورعانىس ءمينيسترى نۇرلان ەرمەكبايەۆ، توتەنشە جاعدايلار ءمينيسترى يۋري يلين، ىشكى ىستەر ءمينيسترىنىڭ ورىنباسارى مۇرات بايمۇقاشيەۆ، ەڭبەك جانە حالىقتى الەۋمەتتىك قورعاۋ، دەنساۋلىق ساقتاۋ، يندۋستريا جانە ينفراقۇرىلىمدىق دامۋ جانە باسقا دا ورتالىق مەملەكەتتىك ورگانداردىڭ ۆيتسە-مينيسترلەرى كىردى.
كوميسسيا الدىنا زالالدى باعالاۋ جانە ءورت پەن جارىلىس سالدارىن جويۋ، زاقىمدالعان ينفراقۇرىلىمدى قالپىنا كەلتىرۋ، سونداي-اق زارداپ شەككەندەرگە الەۋمەتتىك قولداۋ شارالارىن كورسەتۋ بويىنشا مىندەتتەر قويىلدى.