جامبىل وبلىسىنداعى جارىلىستا قازا تاپقان اسكەريلەردىڭ اتى- ءجونى جاريالاندى

جامبىل وبلىسى. قازاقپارات – ق ر قورعانىس مينيسترلىگى جامبىل وبلىسىنداعى اسكەري بولىمدە بولعان جارىلىستا قازا تاپقان اسكەري قىزمەتشىلەردىڭ اتى- ءجونىن جاريا ەتتى، دەپ حابارلايدى قازاقپارات ۆەدومستۆونىڭ سايتىنا سىلتەمە جاساپ.

جامبىل وبلىسىنداعى ينجەنەرلىك وق- دارىلەر قويماسىندا ءورت سالدارىنان كەلىسىمشارت بويىنشا ەكى اسكەري قىزمەتشى - 1981 -جىلى تۋعان سەرجانت مارات سايلاۋ ۇلى مەشىنباي جانە 1981 -جىلى تۋعان ەفرەيتور رۋسلان ءجۇرسىنباي ۇلى جانبولاتوۆ، 1969 -جىلى تۋعان اسكەريلەندىرىلگەن كۇزەت قىزمەتشىسى ازامات ورازبەك دايىربەك ۇلى داليبايەۆ قازا تاپتى.

«سەرجانت مارات مەشىنباي مەن ەفرەيتور رۋسلان جانبولاتوۆ ءورتتىڭ العاشقى مينۋتتارىنان باستاپ اسكەري ءبولىمنىڭ ءورت ءسوندىرۋ كومانداسىنىڭ قۇرامىندا بولدى. جارىلىستاردىڭ جانىندا بولىپ، ولار اۋىر جاراقاتتار الدى. اسكەريلەندىرىلگەن كۇزەت قىزمەتشىسى ورازبەك داليبايەۆ قويمانى كۇزەتۋ جونىندەگى قاراۋىل باستىعىنىڭ كومەكشىسى قىزمەتىن اتقاردى. قىزمەتتىك مىندەتتەرىن اتقارۋدا وق- دارىلەردىڭ جارىلۋى سالدارىنان قازا تاپتى» دەلىنگەن حابارلامادا.

قورعانىس مينيسترلىگى قازا بولعانداردىڭ تۋىستارى مەن جاقىندارىنا قايعىرىپ كوڭىل ايتادى. «قورعانىس ۆەدومستۆوسى تاراپىنان قازا تاپقانداردىڭ وتباسىلارىنا كومەك كورسەتۋ بويىنشا بارلىق شارالار قابىلدانادى»، دەلىنگەن حابارلامادا.

ايتا كەتەيىك، كەشە ساعات شامامەن 19:00 دە جامبىل وبلىسىنىڭ بايزاق اۋدانىندا ورنالاسقان اسكەري ءبولىم قويمالارىنىڭ بىرىنەن ءورت شىعىپ، جارىلىس بولدى. ءورت ءسوندىرۋ بارىسىندا 4 اسكەري قىزمەتشى قازا تاپقان ەدى.