الينا سولودۋحينا توكيو پاراليمپياداسىندا بەسىنشى ورىن الدى

توكيو. قازاقپارات - جاپونيانىڭ توكيو قالاسىندا ءوتىپ جاتقان پاراليمپيادا ويىندارىندا قازاقستاندىق الينا سولودۋحينا پارا پاۋەرليفتينگتەن سايىسقا ءتۇستى، دەپ حابارلايدى قازاقپارات ءتىلشىسى.

ول ايەلدەر اراسىندا 45 كەلى سالماقتا ەل نامىسىن قورعادى.

سايىس بارىسىندا الينا ءۇش مارتە جارىس جولىنا شىقتى. ناتيجەسىندە ونىڭ كورسەتكىشى 83 كەلىنى شامالادى.

وسىلايشا توعىز سپورتشىنىڭ اراسىنان بەسىنشى ورىنعا تابان تىرەدى.

اتالعان سالماقتا نيگەريالىق لاتيفات تيدجاني 107 كەلى سالماقتى باعىندىرىپ، التىن مەدال الدى. ەكىنشى ورىندى قىتايلىق تسۋيگە چجە (102 كەلى) بۇيىرسا، قولا جۇلدەنى پولشالىق يۋستينا كوزدريك (101 كەلى) ەنشىلەدى.

بۇعان دەيىن قازاقستاندىق داۆيد دەگتياريەۆ ەرلەر اراسىندا 54 كەلى سالماقتا چەمپيون اتاندى.

ايتا كەتەيىك، توكيو پاراليمپياداسى 5- قىركۇيەككە دەيىن سوزىلادى. اتالعان جارىستا ەلىمىزدىڭ اتىنان بارعان 26 سپورتشى سپورتتىڭ 7 تۇرىنەن سىنعا تۇسەدى. سونداي-اق، 2016-جىلى برازيليانىڭ ريو-دە-جانەيرو قالاسىندا زۋلفيا گابيدۋللينا ەركىن ادىسپەن 100 مەترگە سۋعا جۇزۋدەن چەمپيون اتانسا، سول جولى راۋشان قويشىبايەۆا پاۋەرليفتينگتەن ايەلدەر اراسىندا 67 كەلىدە كۇمىس جۇلدە الدى.