استانالىق بالالار مەن جاسوسپىرىمدەر سپورتپەن تەگىن اينالىسا الادى
بۇل تۋرالى قالالىق دەنە شىنىقتىرۋ جانە سپورت باسقارماسىنىڭ باسشىسى سامات ەرعاليەۆ ءمالىم ەتتى، دەپ حابارلايدى قازاقپارات ءتىلشىسى.
«بۇگىنگى تاڭدا قالامىزدا بالالار مەن جاسوسپىرىمدەرگە ارنالعان 11 سپورت مەكتەبى جۇمىس ىستەپ تۇر. وندا 8032 سپورتشى تەگىن شۇعىلدانىپ جاتىر. جالپى 73 سپورت بولىمشەسى بار، ونىڭ 57- ءى وليمپيادالىق، 16-سى وليمپيادالىق ەمەس. ودان بولەك، ۇلتتىق جانە ەرەكشە جاندارعا ارنالعان سپورت تۇرلەرى بار»، - دەدى سامات ەرعاليەۆ.
سونداي- اق، باسقارما باسشىسى سپورت مەكتەپتەرىنە بالالاردى قالاي قابىلدايتىنى تۋرالى ايتتى.
«سپورت مەكتەپتەرىنە قابىلداۋ ءار جىلدىڭ قىركۇيەك- قازان ايلارىندا جۇزەگە اسادى. اتا- انالار بالاسى اينالىسقىسى كەلەتىن سپورت ءتۇرى مەن مەكتەپتى تاڭداپ، ءوتىنىش جازادى. اتالعان سپورت تۇرىمەن اينالىسۋعا بولادى دەگەن دارىگەردىڭ رۇقساتىنان سوڭ، ءتيىستى قۇجاتتاردى تاپسىرىپ، بالا تاڭداعان سپورت تۇرىنەن ىرىكتەۋدەن وتەدى. سپورت مەكتەبىنە بەلگىلەنگەن نورماتيۆتەردى ورىنداپ، ىرىكتەۋدەن وتكەن بالالار مەن جاسوسپىرىمدەر قابىلدانادى. بيىل سپورت مەكتەپتەرىنە قابىلداۋ تۋرالى قوسىمشا ءبىزدىڭ الەۋمەتتىك جەلىلەرىمىزدە حابارلاناتىن بولادى»، - دەيدى ول.
ونىڭ ايتۋىنشا، قالالىق باسقارماعا قاراستى 16 سپورتتىق مەكەمە جۇمىس ىستەيدى.
«بىلتىر بىزگە باعىنىستى 7 سپورت مەكەمەسى ءبىر عيماراتقا كوشىرىلدى. ماقسات - سپورتتىق مەكەمەلەردىڭ جۇمىسىن ءبىر جۇيەگە كەلتىرۋ. جانە بۇل سپورتشىلار مەن جاتتىقتىرۋشىلارعا قولايلى جاعداي تۋعىزىپ، ۋاقىتىن ۇنەمدەۋگە مۇمكىندىك بەرەدى. سونداي- اق سپورت مەكتەپتەرىنىڭ ءبىر عيمارات استىنا بىرىگۋى ولاردىڭ ۇيىمشىلدىعىن ارتتىرىپ، بىرلەسىپ جۇمىس ىستەۋگە جول اشتى»، - دەدى س. ەرعاليەۆ.
اۆتور: ءالي يبرايەۆ