قاسىم-جومارت توقايەۆتىڭ جاڭادان شىققان كىتابى تانىستىرىلدى
«بۇگىنگى دوڭگەلەك ۇستەل كونستيتۋتسيا كۇنىنە ارنالىپ وتىر. كونستيتۋتسياعا سايكەس، پرەزيدەنت نەگىزگى زاڭ مىزعىماستىعىنىڭ سيمۆولى ءارى كەپىلى سانالادى. بۇل كىتاپ قازاقستان - نەمىس ۋنيۆەرسيتەتىنىڭ حالىقارالىق جانە ايماقتىق ىنتىماقتاستىق عىلىمي- زەرتتەۋ ينستيتۋتى تاراپىنان ازىرلەنگەن. كىتاپتى باسىپ شىعارۋعا مەملەكەتتىك بيۋدجەتتەن ءبىر تەڭگە دە الىنباعانىنا نازار اۋدارتقىم كەلەدى. كىتاپ جەكەمەنشىك جوعارى وقۋ تاراپىمىزدان دەمەۋشىلىك قولداۋ ەسەبىنەن ازىرلەندى. كىتاپ بيزنەس جوبا ەمەس، ساتۋعا دا ارنالماعان. ول عىلىمي ينستيتۋتتار مەن ءبىلىم بەرۋ مەكەمەلەرىنىڭ كىتاپحانالارىنا بەرىلەدى»، - دەدى باسىلىمنىڭ جاۋاپتى رەداكتورى حالىقارالىق جانە ايماقتىق ىنتىماقتاستىق عىلىمي-زەرتتەۋ ينستيتۋتى ديرەكتورى بولات سۇلتانوۆ.
ونىڭ اتاپ وتۋىنشە، كونستيتۋتسيادا ەلىمىزدى باسقارۋدىڭ پرەزيدەنتتىك فورماسى بەكىتىلگەن.
«تۇرىك كوشباسشىسى ەردوعان ەلىندە پارلامەنتتىك رەسپۋبليكادان پرەزيدەنتتىك رەسپۋبليكاعا كوشۋدى جۇزەگە اسىردى. قىرعىزستاندا دا رەسپۋبليكا پرەزيدەنتتىكپەن پارلامەنتتىككە، ودان كەيىن قايتادان پرەزيدەنتتىككە ترانسفورماتسيا جاسالدى. بۇل مىسالدار كۇردەلى ساياسي جاعدايدا مىقتى پرەزيدەنتتىك بيلىك جانە سوعان وراي پرەزيدەنتتىڭ حالىق پەن مەملەكەت الدىنداعى جەكە جاۋاپكەرشىلىگى ىشكى ساياسي احۋالدى تۇراقتاندىرۋعا ءارى ەلدىڭ وڭىرەگىندەگى سىرتقى ساياسي جاعدايدى تۇبەگەيلى وزگەرتۋگە مۇمكىندىك بەرەتىندىگىن دالەلدەيدى» ، - دەدى ول.