قازاقستان جايلى جازعان شەتەلدىك ۇزدىك تىلشىلەر انىقتالدى
ەل تاۋەلسىزدىگىنىڭ 30 جىلدىعىنا وراي «قازاقستان شەتەلدىك ب ا ق كوزىمەن» اتتى حالىقارالىق بايقاۋ ءوتتى. ونى ۇيىمداستىرۋشى ق ر سىرتقى ىستەر مينيسترلىگى مەن قازاقستان باس رەداكتورلار كلۋبى. ۇيىمداستىرۋشىلاردىڭ ايتۋىنشا، وسىمەن 6-رەت ءوتىپ وتىرعان اتالعان بايقاۋعا الەمنىڭ 36 ەلىنەن 60 ءتىلشى قاتىسقان.
«الدىمەن قوناقتارعا قازاقستانعا قوش كەلدىڭىزدەر دەيمىن. ءبىز ەلگە قىزىعۋشىلىق تانىتىپ، ول تۋرالى ماتەريال جازعاندارىڭىز ءۇشىن العىس بىلدىرەمىز. بايقاۋعا كەلىپ تۇسكەن ماتەريالدار ءارتۇرلى باعىتتا بولدى. ونىڭ ىشىندە قازاقستاننىڭ ەكونوميكاسى، ساياساتى، حالىقارالىق قاتىناىس، تاريح، مادەنيەت، تۋريزم، دەنساۋلىق ساقتاۋ، سپورت، يادرولىق قارۋسىزداندىرۋ، ەنەرگيا كوزدەرى تاقىرىبى قامتىلدى. ودان بولەك، بايقاۋعا ءابۋ ناسىر ءال-فارابي مەن اقىن اباي قۇنانباي ۇلى مۇراسىنا ارنالعان جۇمىستار كەلىپ ءتۇستى. ولار تەلەۆيزيا، گازەت جانە سايتتاردا جارىق كوردى. ارينە پاندەمياعا بايلانىستى ءبىرقاتار شەكتەۋ بولعانى راس. دەگەنمەن بايقاۋ ونلاين وتكەندىكتەن قاتىسۋشىلاردىڭ قىزىعۋشىلىعى ازايعان جوق. بۇگىن مىنە حالىقارالىق بايقاۋ ءوز مارەسىنە جەتىپ، جەڭىمپازداردى ەلوردامىزعا قارسى الىپ وتىرمىز»، - دەدى ق ر سىرتقى ىستەر ءمينيسترىنىڭ ورىنباسارى ەرلان الىمبايەۆ.
قازىلار القاسىنىڭ شەشىمىمەن بايقاۋ ناتيجەسىندە قازاقستان جايلى جازعان 6 اۆتور جەڭىمپاز اتاندى. ولاردىڭ قاتارىندا «ليتۆالىق كۋرەر» اپتالىق باسىلىمدارىنىڭ جانە «ەحو ليتۆا» گازەتىنىڭ باس رەداكتورى نيكولايۋس جۋكوۆاس (ليتۆا)، «Financne Noviny» باسىلىمىنىڭ باس رەداكتورى ۆلاديمير باچيشين (سلوۆاكيا)، پاكىستاننىڭ جاھاندىق جانە ستراتەگيالىق زەرتتەۋلەر ورتالىعىنىڭ ايماقتىق ساراپشىسى مەحمۋد ۋل حاسسان حان (پاكىستان)، كانادانىڭ كوشى-قون جانە مۋلتيكۋلتۋراليزم ماسەلەلەرى جونىندەگى بۇرىنعى ءمينيسترى توني رۋپرەحت (كانادا)، «BCI Media» كومپانياسىنىڭ كوممەرتسيالىق پروديۋسەرى ينگا چەرنەي (كانادا) جانە MNB تەلەارناسىنىڭ ءتىلشىسى سولمون باتەردەنە (موڭعوليا) بار.
«ەلىمىزدىڭ جەتىستىكتەرىن شەتەلدىك ب ا ق-تىڭ جازىپ جاتقانى قۋانتادى. تىلشىلەردىڭ جۇمىسى ءارقاشان حالىق نازارىندا. ارىپتەستەرىمنىڭ قانداي جاعدايدا جۇمىس ىستەيتىنىمەن تانىسپىن، ءوزىم دە جۋرناليسپىن. قازىرگى ۋاقىتتا الەمدەگى ەپيداحۋالدى بىلەسىزدەر، سوعان قاراماستان تىلشىلەر ءاردايىم الدىڭعى شەپتە جۇرەدى. بايقاۋعا شەتەلدىك ب ا ق وكىلدەرى بەلسەنە قاتىستى. وسى 6 جىلدىڭ ىشىندە بايقاۋعا الەمنىڭ ءارتۇرلى ەلىنەن جۇزدەگەن ءتىلشى قازاقستان جايلى جازدى. ۇيىمداستىرىلىپ وتىرعان شارا تەك قازاقستان جايلى ماتەريالدار جازۋىمەن شەكتەلمەيدى، بۇل قازاق جۋرناليستيكاسىنىڭ بەدەلىن ارتتىرىپ، ارىپتەستەرىمىزدىڭ كاسىبي دامي تۇسۋىنە ۇلەسىن تيگىزەد»، - دەدى قازاقستان باس رەداكتورلارى كلۋبىنىڭ پرەزيدەنتى بيبىگۇل جەكسەنباي.
بايقاۋ جەڭىمپازدارى سىي-سياپاتتان بولەك، ەلىمىزدىڭ كورىكتى قالالارى نۇر-سۇلتان، الماتى، تۇركىستان جانە بۋراباي دەمالىس ايماعىنا بارۋ مۇمكىندىگىنە يە بولدى.
«جىلى قارسى العاندارىڭىز ءۇشىن العىسىمدى بىلدىرەمىن. قازاقستانعا كەلگەنىمە قۋانىشتىمىن. ءبىزدىڭ پرەمەر-مينيستر ق ر پرەزيدەنتىمەن كەزدەسۋ وتكىزدى، بۇل ۇلكەن ساياسي قادام. ءبىز قازاقستاننىڭ جەتىستىكتەرى تۋرالى كوپ بىلەمىز. قازاقستان الەم تىلشىلەرىنىڭ نازارىندا دەسەمدە بولادى. سونداي-اق، قازاقستاننىڭ ورتالىق ازيا بويىنشا ۇلگى تۇتاتىن ەل رەتىندە عانا ەمەس، الەمدىك دەڭگەيدە ۇلگى الارلىق تۇستارى جەتكىلىكتى. وسى ورايدا ەل پرەزيدەنتى قاسىم-جومارت توقايەۆ مىرزانىڭ مىنا ءسوزى ەسىمە ءتۇسىپ تۇر.
«ءبىز بۇگىندە جاڭا الەمدە ءومىر ءسۇرىپ جاتىرمىز. ومىردە بولىپ جاتقان وزگەرىستى سارالاپ، شۇعىل شەشىم قابىلداي ءبىلۋىمىز كەرەك»، - دەدى ول. كانادانىڭ كوشى-قون جانە مۋلتيكۋلتۋراليزم ماسەلەلەرى جونىندەگى بۇرىنعى ءمينيسترى، بايقاۋ جەڭىمپازى توني رۋپرەحت.