اۋىلداردا ارنايى كەڭەس جۇمىس ىستەيتىن بولادى
بۇل تۋرالى ق ر ۇلتتىق ەكونوميكا مينيسترلىگى وڭىرلەردى تالداۋ جانە جەرگىلىكتى ءوزىن- ءوزى باسقارۋدى دامىتۋ دەپارتامەنتى ديرەكتورىنىڭ ورىنباسارى ميرجان يمانبايەۆ ءمالىم ەتتى، دەپ حابارلايدى قازاقپارات ءتىلشىسى.
«2021-2025 -جىلدارعا ارنالعان جەرگىلىكتى ءوزىن- ءوزى باسقارۋ تۇجىرىمداماسىنا سايكەس 2024 -جىلدان باستاپ ەلىمىزدە اۋدان اكىمدەرىنىڭ سايلاۋى وتپەك. جەرگىلىكتى ءوزىن- ءوزى باسقارۋعا قاتىستى تاعى ءبىر جاڭالىق، اۋىلدىق جەرلەردە كەڭەس قۇرىلادى. نەگىزى بۇعان دەيىن دە اۋىلدىق وكرۋگتەردە جەرگىلىكتى قوعامداستىق دەگەن ورگان بولدى، ءبىراق ونىڭ زاڭدى كۇشى بولمادى. ياعني قوعامداستىق تەك ۇسىنىس بىلدىرۋگە قۇقىلى ەدى. ەندى سول قوعامداستىقتى كەڭەس دەپ اتاپ، ونىڭ قۇزىرەتى مەن قىزمەتىن جانداندىرماقپىز. كەڭەس مۇشەلەرى سايلانىپ، ولارعا دەپۋتات سەكىلدى قۇزىرەت بەرىلەدى. كەڭەس مۇشەلەرىن اۋىل حالقى ءوزى سايلايدى. كەڭەس سول اۋىلداعى ماسەلەلەردى نازاردا ۇستاپ، ونىڭ شەشىلۋىنە اتسالىسادى. حالىق پەن اكىم اراسىنداعى كوپىر دەسەك تە بولادى. ەلدى مەكەندەردە كەڭەس جۇمىسىن بەكىتىپ، ونىڭ مۇشەلەرىن سايلاۋ 2024 -جىلعا جوسپارلانىپ وتىر»، - دەدى ميرجان يمانبايەۆ.
ودان بولەك، مينيسترلىك وكىلى اۋىل بيۋدجەتىنە قاتىستى جاڭاشىلدىقپەن تانىستىردى.
«2018 -جىلدان باستاپ اۋىل اكىمدىكتەرىنە بيۋدجەتتى باسقارۋ قۇزىرەتى بەرىلدى. بۇگىندە اۋىلدىق وكرۋگتەر 6 سالىق ءتۇرى بويىنشا ءوز تابىستارىن قازىناعا قۇيىپ وتىر. دەگەنمەن بۇل 10-15 پايىزدى عانا قۇرايدى، ال قالعان 80-85 پايىز قاراجات اۋداندىق بيۋدجەتتەن قاراستىرىلادى. وسى ورايدا ءبىز اۋىلدىق ەلدى مەكەندەر ءۇشىن قوسىمشا سالىق ارقىلى كىرىس كوزىن اشپاقپىز.
اتاپ ايتقاندا، 2022 -جىلى 4 سالىق جانە 2024 -جىلى تاعى بىرنەشە سالىق ءتۇرى ەنگىزىلەدى. وسىلايشا 2025 -جىلى اۋىل بيۋدجەتىنىڭ 3/1 بولىگىن وزدەرى قامتي الادى. ودان بولەك، اۋىل بيۋدجەتىنە قاتىستى قاعازباستىلىق ماسەلەسى بار، ونى جويۋ ءۇشىن پروتسەستى ەلەكتروندى جۇيەگە كوشىرۋ قاراستىرىلىپ جاتىر»، - دەيدى ول.
بۇعان دەيىن حابارلاعانىمىزداي، ەلىمىزدە جەرگىلىكتى ءوزىن- ءوزى باسقارۋدىڭ 2021-2025 -جىلدارعا ارنالعان تۇجىرىمداماسى قابىلداندى.