نۇر-سۇلتاندا ەكى جاڭا گاز قازاندىعى سالىنادى

نۇر-سۇلتان. قازاقپارات - ەلوردادا ەكى جاڭا گاز قازاندىعى سالىنادى. بۇل تۋرالى قالا اكىمى التاي كولگىنوۆ ايتتى، دەپ حابارلايدى قازاقپارات ءتىلشىسى.

«ەندى ەلوردانىڭ تىنىس- تىرشىلىگىنە قاتىستى ماڭىزدى ماسەلەلەرگە توقتالايىن. بىزدە جىلۋ بەرۋ ماۋسىمى اۋا رايىنا بايلانىستى 7,5, ءتىپتى 8 ايعا سوزىلادى. بۇل ەكونوميكاعا وتە ۇلكەن جۇكتەمە. پرەزيدەنت تاپسىرماسىنا سايكەس ءۇشىنشى جىلۋ ەلەكتر ستاناسىنىڭ جۇمىسىن جانداندىردىق. كەلەر جىلى ىسكە قوسۋعا ءتيىسپىز. ول 420 گكال جىلۋ بەرەدى نەمەسە 6,5 ميلليون شارشى مەتر تۇرعىن ءۇي مەن باسقا دا نىسانداردى جىلۋمەن قامتاماسىز ەتەدى»، - دەدى ول نۇر-سۇلتان قالالىق ءماسليحاتىنىڭ كەزەكتەن تىس سەسسياسىندا.

قالا باسشىسىنىڭ اتاپ وتۋىنشە، ەلوردادا جىل سايىن 3 ميلليون باسپانا سالىناتىن بولادى. ال مۇنداي جاعدايدا اتالعان ستانسا قالانى جىلۋمەن تولىقتاي قامتاماسىز ەتە المايدى.

«سوندىقتان وتكەن جىلى شەشىم قابىلداپ، ونى ۇكىمەت ماقۇلدادى جانە ءاربىرى 360 گكال بولاتىن 2 جاڭا گاز قازاندىعىنىڭ قۇرىلىسىنا قارجى بولىنەدى. دەمەك، كەلەسى جىلدىڭ سوڭىنا قاراي 1100 گكالدان استام جىلۋ الۋىمىز كەرەك. بۇل ەلوردامىزدىڭ، اسىرەسە جاڭا قۇرىلىس اۋداندارىنىڭ ۇزاقمەرزىمدى تىنىس- تىرشىلىگىن قامتاماسىز ەتەدى. ماسەلەن، 2020 -جىلى تەك ەسىل اۋدانىنىڭ تۇرعىندارى 40 مىڭ ادامعا ءوستى. بۇل وبلىستارداعى 2-3 اۋدان تۇرعىنىمەن تەڭ»، - دەدى التاي كولگىنوۆ.