اۋعانستاندىق ستۋدەنتتەر قازاقستاندا قالدىرۋدى سۇراپ وتىر
بەس جىل بويى مەملەكەتارالىق كەلىسىممەن وقىعان 12 تۇلەكتىڭ ۆيزاسى 1-قىركۇيەكتە اياقتالادى ەكەن. سولاردىڭ ءبىرى ابدۋلكاسار راسسۋلي قازىر سول جاقتاعى اتا- اناسى ءۇشىن الاڭدايدى. ءوزىنىڭ ەلگە قايتقىسى جوق. ۆيزا مەرزىمىن ۇزارتسا دەگەن ءوتىنىشى بار. ال كوشى- قون پوليتسياسى ازىرگە قانداي دا ءبىر شەشىمگە كەلگەن جوق.
قازىر بۇل ستۋدەنتتەر وقۋى اياقتالسا دا ۋنيۆەرسيتەتتىڭ جاتاقحاناسىندا تۇرىپ جاتىر. قۇرىلىسشى ديپلومىن العان شەتەلدىكتەر ۆيزا بولماعان سوڭ جۇمىسقا دا تۇرا المايدى.
ابدۋلكاسار راسسۋلي، قاراعاندى تەحنيكالىق ۋنيۆەرسيتەتىنىڭ تۇلەگى، اۋعانستان ازاماتى:
- ءبىز ەلىمىزگە بارا الماي جاتىرمىز. ويتكەنى سول جاقتا سوعىس بولىپ جاتىر. ءبىز جاسپىز عوي، جاقسى ءومىر سۇرگىمىز كەلەدى. سول ءۇشىن بارا المايمىز. ول جاقتا سوعىس. ويتكەنى ءبىز باسقا ەلدەن كەلەمىز عوي. ەگەر ءبىز اۋعانستانعا بارساق، «تاليبان» ءبىزدى ولتىرەدى. نە ءۇشىن باسقا ەلگە بارىپ وقىدىڭ دەپ.
جارقىن تۇسىپبەكوۆ، قارتۋ رۋحاني- ادامگەرشىلىك تاربيە جونىندەگى كەڭەس ءتوراعاسىنىڭ ورىنباسارى:
- ۋنيۆەرسيتەت اكىمشىلىگى قيىن جاعدايعا تۇسكەن شەتەلدىك ستۋدەنتتەرگە ۇنەمى قولداۋ كورسەتىپ كەلەدى. قازىرگى جاعدايدا ەڭ باستى ماسەلە - ۆيزا مەرزىمىن ۇزارتۋ. سودان كەيىن ەلشىلىككە حابارلاسۋعا بولادى. ءبىز ءوز تاراپىمىزدان ازىرگە ولاردى جاتاقحانامەن قامتاماسىز ەتىپ وتىرمىز.