ۆاكسينالاۋ شاريعات زاڭىنا قايشى ەمەس پە

الماتى. قازاقپارات - الماتى قالاسىنىڭ ءدىن ىستەرى باسقارماسىنىڭ اقپاراتتىق- ءتۇسىندىرۋ توبىنىڭ مۇشەسى، فيلوسوفيا عىلىمدارىنىڭ دوكتورى گۇلنار جۇمانوۆا ونلاين بريفينگ بارىسىندا ۆاكسينا سالۋ جونىندەگى يسلامدىق ءپاتۋا تۋرالى ايتتى، دەپ حابارلايدى قازاقپارات ءتىلشىسى.

سپيكەر قازىرگى تەولوگيا بارلىق وزەكتى ماسەلەلەرگە، سونىڭ ىشىندە دەنساۋلىق ساقتاۋ مەن ۆاكسينا سالۋعا قاتىستى سۇراقتارعا جاۋاپ بەرەتىنىن جەتكىزدى. ونىڭ پىكىرىنشە، شاريعات ەرەجەلەرىنىڭ ءبىرى - قاۋىپتىڭ الدىن الۋ. سوندىقتان يممۋنداۋدى جۇرگىزگەن ءجون، ويتكەنى ۆاكسينا سالۋدىڭ زياننان گورى پايداسى كوپ. دەمەك، ەكپە سالدىرۋ وتە قاجەت.

«ماسەلەن، ب ا ءا، تۇركيا، مالايزيا سياقتى مۇسىلمان ەلدەرىندە كوروناۆيرۋسقا قارسى ۆاكسينا ۋلەما ءپاتۋاسىنىڭ رۇقساتىمەن جۇرگىزىلەدى. ساۋد ارابياسى ۆاكسيناتسيامەن قامتۋ بويىنشا الەمدەگى ەڭ جوعارى ەلدەردىڭ ءبىرى جانە وسى ەل ۇكىمەتىنىڭ ءوتىنىشى بويىنشا مەككەگە قاجىلىققا قاتىسۋشىلاردىڭ بارلىعىنا COVID-19 ۆاكسيناسى مىندەتتى. ال، ءبىزدىڭ ەلدە كوپ جىلدار بويى قازاقستان مۇسىلماندارى ءدىني باسقارماسىنىڭ ءپاتۋاسى قولدانىستا. وندا «يسلامدا ادام ءومىرى مەن دەنساۋلىعىنان ارتىق قۇندىلىق جوق، سوندىقتان اركىم ءوز دەنساۋلىعىنا ەرەكشە نازار اۋدارۋى كەرەك دەلىنگەن»، - دەيدى سپيكەر.

گۇلنار جۇمانوۆا «اۋىرىپ ەم ىزدەگەنشە اۋىرمايتىن جول ىزدە» دەگەندى باسا ايتتى. سوندىقتان ءار ادام دەرتتى ەمدەۋ مەن ونىڭ الدىن الۋ جولدارى تۋرالى ويلانۋى ءتيىس.

«شاريعات زاڭى ۆاكسيناعا رۇقسات ەتەدى. ءبىزدىڭ ەلدە جانە الەمدە ەپيدەميالىق جاعدايدىڭ ناشارلاۋىنا بايلانىستى، يممۋنداۋ شۇعىل تۇردە قاجەت. سوندىقتان قمبد تۇرعىنداردى دەنساۋلىقتارى مەن ومىرلەرىن ساقتاپ قالۋ ءۇشىن ۆاكسينالانۋعا شاقىرادى. اللانىڭ قالاۋى - ادامداردىڭ دەنىنىڭ ساۋ بولۋى، ال باستى ارەكەت - ەكپە سالدىرۋ. سوندا عانا ءوزىمىز دە، ەلىمىز دە ءقاۋىپسىز بولادى»، - دەدى گۇلنار جۇمانوۆا.

اۆتور: الما مۇقانوۆا