جايىق وزەنىنىڭ كاسپيي تەڭىزىنە قۇيار ساعاسىنىڭ تەرەڭدىگى ولشەندى

اتىراۋ. قازاقپارات - اتىراۋدا جايىق وزەنىنىڭ كاسپيي تەڭىزىنە قۇيار ساعاسىنىڭ تەرەڭدىگى ولشەندى، دەپ حابارلايدى قازاقپارات.

اتىراۋ وبلىستىق بالىق شارۋاشىلىعى باسقارماسى باسپا ءسوز قىزمەتىنىڭ مالىمەتىنشە، ارنايى توپ قۇرىلىپ، جايىق وزەنىنىڭ كاسپي تەڭىزىنە قۇيار ساعاسىندا ولشەۋ جۇمىستارى جۇرگىزىلدى. توپ قۇرامىنا وبلىستىق بالىق شارۋاشىلىعى باسقارماسىنىڭ باسشىسى ارتۋر سادىبەك ۇلى، «قازگيدرومەت» ر م ك اتىراۋ وبلىستىق فيليالىنىڭ تەحنيك- گيدروليگى فازيلات قۇسايىنوۆ، وبلىستىق ەكولوگيا دەپارتامەنتىنىڭ باس مامانى ءاسيما قايىرجانوۆا، بالىق شارۋاشىلىعى سالاسىنىڭ ارداگەرى سانات تىلەپبەرگەنوۆ، تابيعات پايدالانۋشى مەكەمەلەر مەن بۇقارالىق اقپارات قۇرالدارىنىڭ وكىلدەرى كىردى.

ماقسات - وزەننىڭ تەڭىزگە قۇيار ساعاسىنداعى سۋ تەرەڭدىگىن انىقتاۋ. ولشەۋ جۇمىستارىن جۇرگىزگەن توپ مۇشەلەرى جايىق وزەنىنىڭ كاسپيي تەڭىزىنە قۇيار ساعاسى وتە تايىز دەگەن قورىتىندىعا جاسادى.

ناقتىلاي ايتقاندا، سۋدىڭ تەرەڭدىگى جايىق وزەنىنەن 1 شاقىرىم قاشىقتىقتا - 1,10 مەتر، 800 مەتر جەردە - 0,75 مەتر، 500 مەتر تۇستا - 0,71 مەتر، 300 مەتر اۋماقتا - 0,83 مەتر، ال، تەڭىزگە قۇيار ساعاسىندا 0,43 مەتردى قۇراعان.

«بۇل - وتە تومەن دەڭگەي. ونىڭ ۇستىنە، بىرنەشە كۇننەن بەرى تەڭىز جاقتان جەل سوعىپ تۇر. دەمەك، تەڭىز سۋى وزەنگە كەلىپ جاتىر. سونىڭ وزىندە وزەننىڭ تەڭىزگە قۇيار ساعاسى بىتەلىپ جاتىر. ال، تەڭىز سۋى كەرى قايتقاندا نە بولماق؟ سوندىقتان، تەز ارادا تەڭىز ءتۇبىن قازۋ قاجەت. تەڭىزدىڭ وزەنگە قۇيار ساعاسى تەرەڭدەتىلمەسە، بالىقتار دا، كەمەلەر دە تايىز سۋدان وتە المايدى. بۇل سۋ استىنداعى تىرشىلىككە دە، بالىق كاسىپشلىگىنە دە كەرى اسەرىن تيگىزەدى» - دەيدى ارتۋر سادىبەك ۇلى.

اۆتور: بەك مۇستافا