قازاقستاندا جاساندى جاۋىن- شاشىن تۋدىرۋ جولدارى ۇسىنىلدى

نۇر-سۇلتان.قازاقپارات - ەلدىڭ قۇرعاق ايماقتارىندا قولدان جاڭبىر جاۋعىزۋ ۇسىنىسىن وتاندىق كاسىپكەرلەر ۇسىنعان. بۇل تەحنولوگيا الەمگە وتكەن عاسىردىڭ اياعىنان بەرى بەلگىلى. الايدا ەلىمىزدە بۇل جايلى العاش رەت ايتىلىپ وتىر.

«اسپاندا بۇلت ءتۇزىلىپ جاۋىن سەبەلەي باستايدى. ءبىز اۋا رايىن باسقارا الامىز. ال بارلىق پايدا جەرگە كەلىپ تۇسەدى. سونىمەن قاتار ەشقانداي حيميالىق قوسىندىلاردىڭ قاتىسۋىنسىز»، - دەيدى كليماتتى وزگەرتۋ تەحنولوگيالار سالاسىنداعى حالىقارالىق جوبانىڭ باستاۋشىسى التاي اينابەك.

باسقاشا سوزبەن تۇسىندىرەتىن بولساق، اتموسفەراعا يوندار اعىنى جىبەرىلىپ، سونىڭ ارقاسىندا جاڭبىر كەزەڭىنە جەتپەگەن بۇلتتار كوندەنساتسيالانىپ، جاڭالارى پايدا بولادى. تەحنولوگيانى رەسەيدە جاساپ شىعارعان. ءبىر گەنەراتور 200 ك م. راديۋستا جاۋىن- شاشىن بولۋىنا جاعداي جاساپ، ايماقتاعى ىلعالدىلىقتىڭ ۇشتەن ءبىر بولىگىن ارتتىرادى. كومپانيا وكىلدەرى بۇل ءتاسىلدىڭ حالىقتىڭ دەنساۋلىعى مەن قورشاعان ورتاعا زيانى جوق دەپ سەندىرەدى.

قاۋىپسىزدىكتى تەكسەرۋ شاراسى بەلگيادا ءساتتى وتكەن. شولدەگى 50 گرادۋستىق ىستىقتا جاۋىن جاۋعىزۋ قيالي ارمان ەمەس، ادام قولىمەن جاسالاتىن دۇنيە ەكەنىن بىرىككەن اراب امىرلىكتەرى دالەلدەپ بەرگەن. وسىعان ۇقساس تەحنولوگيالاردى ءۇندىستان، قىتاي جانە شۆەيتساريا ەلدەرى قولدانۋدا. شەتەلدە ولاردى پايدالانۋ شىعىندارى 10 ميلليوننان 50 ميلليون ەۋروعا دەيىن جەتۋى مۇمكىن. ال اقتاۋدا قولعا الىنعان سىناققا ون ەسە از سوما - جارتى ميلليارد تەڭگە قاجەت ەتىلەدى.

ق ر ءماجىلىس دەپۋتاتى ەدىل ءجانبىرشيننىڭ ايتۋىنشا، بيىلعى جىلى اتالعان وبلىسقا 2 ەسە از جاۋىن جاۋعان.

«قازىرگى تاڭدا ماڭعىستاۋ وبلىسىنىڭ كليماتتىق مۇمكىندىكتەرى مەن اۋماقتى قامتۋ جولدارىن قاراستىرىپ جاتىرمىز. جاساندى جاۋىن جاۋعىزۋ مۇمكىندىكتەرى وسىعان دەيىن رەسەيدىڭ ياكۋتياداعى، يركۋتسك وبلىسىنداعى جانە كرانويارسك ايماعىندا بولعان ماسشتابتى ورمان ورتتەرىن سوندىرۋگە ۇلكەن كومەگىن تيگىزدى»، - دەيدى ەدىل جانبىرشين.

ماڭعىستاۋ وبلىسى جەرگىلىكتى بيلىك ورگاندارى مەن كاسىپكەرلەردەن قارجىلىق قولداۋ كۇتەدى. اتالعان ايماقتا قولعا الىنعان ءادىستىڭ باستاماشىلارى قۇرعاقشىلىقپەن كۇرەسۋدىڭ باسقا ءادىسىن كورمەيدى.