ءماجىلىس ءتوراعاسى ورىنباسارىنىڭ ايتۋىنشا، قازاقستاندا ءتىل ەركىندىگى بويىنشا ەشقانداي پروبلەما جوق. بۇل ويىن ول Facebook-تەگى پاراقشاسىندا جازدى.
«سوڭعى كەزدە ءجيى تالقىلانىپ جاتقان ۇلتارالىق كەلىسىم، ءتىل ماسەلەلەرى تۋرالى ويىمدى ورتاعا تاستاعىم كەلەدى. ءبىزدىڭ ەلدە بۇل تۇرعىدا پروبلەما جوق. ءتۇرلى ۇلت وكىلدەرى ءاردايىم ءبىر- بىرىمەن بەيبىت ءومىر ءسۇرىپ كەلە جاتىر. ءوزارا ءتۇسىنىسۋ بويىنشا ەشقاشان پروبلەما بولعان جوق. قازاق ءتىلى اياسىن كەڭەيتىپ كەلەدى. ءتۇرلى ۇلت وكىلدەرى ءۇشىن بۇل ءومىردىڭ اجىراماس بولىگىنە اينالىپ وتىر. ۇلتى باسقا قازاقستاندىقتاردىڭ قازاق تىلىندە ەركىن سويلەۋى قازىر ەشكىمگە تاڭسىق ەمەس. مۇنىڭ ءبارى ەۆوليۋتسيالىق جولمەن، ماجبۇرلەۋسىز ءجۇرىپ جاتىر»، - دەپ جازدى دەپۋتات.
سونداي- اق، ول اراكىدىك بولاتىن جەكەلەگەن جاعدايلارعا قاراپ قازاقستانداعى تىلدىك احۋالعا باعا بەرۋگە بولمايتىنىن ەسكە سالدى.
«قازاقستانداعى ەتنوسارالىق جاعدايعا تىم قاتتى الاڭداپ وتىرعانداردىڭ بارىنە ايتقىم كەلەدى. جەكەلەگەن جاعدايلار مۇنداعى تۇتاس احۋالدى سيپاتتاي المايدى. ءبىز بۇعان دەيىن دە كەلىسىمدە ءومىر سۇردىك جانە سولاي ءومىر سۇرە بەرەمىز!»، - دەپ تۇيىندەدى پاۆەل كازانتسيەۆ.