بۇل تۋرالى بۇگىن جۋرناليستەرگە گرۋزيانىڭ دەنساۋلىق ساقتاۋ مينيسترلىگى باسشىسىنىڭ ورىنباسارى تامار گابۋنيا ءمالىم ەتتى، دەپ حابارلايدى قازاقپارات newsgeorgia.ge-گە سىلتەمە جاساپ.
«وسىنداي قاجەتتىلىك تۋعاننان كەيىن كەشە كەشكە دالالىق گوسپيتال جۇمىسىن باستادى. ول جەرگە توعىز ناۋقاس جاتقىزىلعان، بارلىعىنىڭ جاعدايى ورتاشا اۋىر. گوسپيتال بۇگىننەن باستاپ تولىق جۇكتەمەمەن جۇمىس ىستەي باستايدى»، - دەدى گابۋنيا.
ول دالالىق گوسپيتالدىڭ ناۋقاستاردى ۋاقىتشا ورنالاستىرۋ ءۇشىن دايىندالعانىن اتاپ ءوتتى. ونىڭ ايتۋىنشا، ناۋقاستار وسىندا تۇسكەننەن كەيىن 2-3 كۇن وتە كوۆيد وتەل نەمەسە اۋرۋحاناعا اۋىستىرىلۋى كەرەك.
«ءبىز ءۇشىن ەڭ ماڭىزدىسى - ناۋقاستاردىڭ جاعدايىن دەر كەزىندە تۇراقتى ەتۋ، ارتىنشا ولاردىڭ جاعدايىنا قاراي ءتيىستى جەرگە اۋىستىرۋ. مەنىڭشە ناۋقاستار دالا گوسپيتالىندە 2-3 كۇننەن ارتىق قالماۋى كەرەك»، - دەدى گابۋنيا.
جالپى ديگوميدەگى دالا گوسپيتالى 500 ادامعا ارنالعان. ول وكپەنى جاساندى جەلدەتۋ اپپاراتى جانە وتتەگى تسيستەرنالارىمەن جابدىقتالعان. ەلدىڭ دەنساۋلىق ساقتاۋ ءمينيسترىنىڭ ايتۋىنشا، ورتالىقتى جاساقتاۋعا 150 مىڭ لاري كەتكەن. بۇعان دەيىن مينيسترلىك دالا گوسپيتالى تەك جاعدايى ورتاشا اۋىر جانە اۋىر ەمەس ناۋقاستاردى قابىلدايتىنىن مالىمدەگەن بولاتىن.
تيكارادزەنىڭ سەندىرۋىنشە، وسىندا جۇمىس ىستەيتىن مەديتسينالىق ۇجىم ارنايى دايىندىقتان وتكەن، جۇمىسقا جارامدى. سامگوري اۋدانىندا تاعى ءبىر دالالىق گوسپيتال جابدىقتالعان. الايدا ونى ىسكە قوسۋ ازىرگە جوسپاردا جوق. وسىنداي پۋنكتتەر جاقىن ارادا اجاريا مەن يمەرەتيادا پايدا بولۋى مۇمكىن. گرۋزيادا كوروناۆيرۋستىڭ ءتورتىنشى تولقىنى ءوتىپ جاتىر.
ەلدەگى ورتاشا تاۋلىكتىك كورسەتكىشتەر ەپيدەميانىڭ باسىنان بەرگى بارلىق رەكوردتى جاڭارتتى. اۋرۋحانالارداعى كوروناۆيرۋس جۇقتىرعان ناۋقاستارعا ارنالعان بولىمشەلەر تولىق. جالپى قازىرگى كەزدە ەلدە 59 مىڭ ناۋقاس بار. 48,9 مىڭ ناۋقاس ۇيدە ەمدەرىپ جاتىر، ولاردى وتباسىلىق دارىگەرلەر باقىلاۋعا العان.
ستاتسيونارلارعا كەلەتىن بولساق، گرۋزيا اۋرۋحانالارىندا كوروناۆيرۋس جۇقتىرعان ناۋقاستارعا ارنالعان بارلىق 7 650 توسەك- ورىننىڭ 412 ءسى عانا بوس.