«رەسەيلىك ب ا ق- تا قازاقستان ءناتسيزمدى اقتاۋعا تىرىسۋدا دەگەن سىندى ماسەلە قايتا كوتەرىلىپ جاتىر. ساياسي قۋعىن- سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيانىڭ اقپاراتتىق جۇمىستار توبىنىڭ جەتەكشىسى رەتىندە مىنانى ايتقىم كەلەدى. بۇل قاساقانا جازىلعان ءبىرىنشى ماتەريال ەمەس. ادەتتە مۇنداي ماتەريالدىڭ اۆتورى قازاقستاندىق ساياساتكەرلەر مەن تاريحشىلاردىڭ ماتىنىنەن سوزدەرىن جۇلىپ الىپ، ونى وزدەرىنىڭ ناقتى ساياسي جانە وزگە دە ناتيجەلەرىنە جەتۋگە ءتيىمدى تۇرعىدا تۇسىندىرەدى. سونىڭ ىشىندە مەملەكەتتىك دۋما سايلاۋى قارساڭىندا دا. رەزونانستى تاقىرىپتاردىڭ ءبىرى، ماسەلەن، ەكىنشى دۇنيەجۇزىلىك سوعىس جىلدارىنداعى تاريحي جايتتارعا، كونتسلاگەرلەردىڭ قاسىرەتىنە بايلانىستى ءتىرى قالۋعا ءماجبۇر بولعان، ونىڭ ىشىندە تۇركىستان لەگيونىنىڭ ساپىنا قوسىلعان وتانداستارىمىزدىڭ تاعدىرىنا قاتىستى. بىردەن ايتۋ كەرەك، بۇل تاقىرىپ تۇتقىنعا تۇسكەن قازاقتاردىڭ، ۆەرماحت اسكەرىنە قىزمەت ەتكەن قازاقتاردىڭ سانىنان باستاپ، ولاردىڭ تاريحي تاعدىرىنا دەيىن از زەرتتەلگەن»، - دەپ جازدى ايدوس سارىم Telegram پاراقشاسىندا.
ونىڭ اتاپ وتۋىنشە، قازاقستاندا ەشكىم ەكىنشى دۇنيەجۇزىلىك سوڭعىس ناتيجەسىن قايتا قاراۋ، ناتسيزم مەن فاشيزمدى اقتاۋ جايىندا ءسوز قوزعاپ وتىرعان جوق. ءسوز ومىرلىك كۇردەلى جاعدايلارعا تاپ بولعاننان كەيىن ءومىر سۇرۋگە ۇمتىلعان، ءتىپتى، مۇمكىندىك تۋىنداعان ساتتە قولىنا قارۋ الىپ، ناتسيزمگە قارسى سوعىسقان ناقتى تاعدارلار جايىندا بولىپ وتىر.
«نەگە ءبىز ولاردى اقتاي الماۋىمىز كەرەك؟ مۇنىڭ ۇستىنە ولاردىڭ باسىم بولىگى ۇزاق ۋاقىت تۇرمەدە وتىردى، ەندى ءبىر بولىگى زامانىندا كەڭەس سوتىمەن، پروكۋراتۋرا ورگاندارىمەن اقتالدى. ارىپتەسىم بەرىك ءابدىعالي ۇلى «ءاربىر ناقتى جايت بويىنشا سوتتىڭ شەشىم قابىلداۋىنا نەگىز بولاتىن تاريحي قۇجاتتار، مۇراعات فاكتىلەرى تۋرالى ءسوز بولۋى تيىستىگىن» تۋرا ايتتى. بايقاساڭىز، اڭگىمە تۇركىستان لەگيونىن قۇبىلىس نەمەسە ينستيتۋت رەتىندە جاپپاي اقتاۋ جايىندا بولىپ وتىرعان جوق»، - دەگەن ايدوس سارىم قازاقستان حالىقارالىق ۇيىمدار اياسىنداعى مىندەتتەمەلەرىنەن تايمايتىندىعىنا دا باسا ايتادى.