كاليفورنيادا ماڭگىلىككە قۇرعاقشىلىق ورناۋى مۇمكىن
ماتەريالدىق شىعىن كولەمى 1 ميلليارد ەۋروعا جەتتى. جالپى، ءتىلسىز جاۋدان يتاليادان بولەك جەرورتا تەڭىزى جاعالاۋىنداعى باسقا ەلدەر دە زارداپ شەكتى. كاليفورنيا دا كۇيزەلىپ وتىر. ەۋروپانى كۇيزەلتكەن ورمان ءورتى جەرورتا تەڭىزى جاعالاۋىنداعى تاعى ءبىر ەل - فرانسياعا جەتتى. بىرنەشە كۇننەن بەرى ىرىق بەرمەگەن وت بۇگىنگە دەيىن 7 مىڭ گەكتار اۋماقتى تىپ- تيپىل ەتتى. 2 ادام كوز جۇمعان. 30 عا جۋىعى زارداپ شەكتى. ولاردىڭ اراسىندا ءورت سوندىرۋشىلەر دە بار. العاشىندا تابيعي قورىقتى جالىن شارپىعان ەدى.
قازىر ءتىلسىز جاۋ ەلدى مەكەندەرگە جەتكەن. سوندىقتان 10 مىڭ ادام ءۇي- جايىن تاستاپ، ۋاقىتشا ورتالىقتارعا كوشىرىلدى. مىناۋ - ەۆاكۋاتسيالانعان تۇرعىندار. ءبىر بولىگى عيمارات ىشىنە جايعاستىرىلعان. ەندى سىيماعاندارى وسىلاي اشىق اسپان استىندا تۇنەۋگە ءماجبۇر.
ۆاسيلي بارتولەتتي، جەرگىلىكتى تۇرعىن:
- ءبىز مىنا ۋاقىتشا ورتالىققا دۇيسەنبى كۇنى كەلدىك. العاشىندا دۇرىس ۇيىقتاي المادىق. ويتكەنى توسەك بولماعان. ءبىز سپورتپەن اينالىسۋعا ارنالعان كىلەمدەردى توسەپ، سولاردىڭ ۇستىندە جاتتىق.
گرەكيادا ورمان ورتەنىپ جاتقانىنا ءبىراز بولدى. ماماندار ءبىر القاپتى سوندىرسە، ەندى ءبىرى جاڭادان ورتەنىپ جاتىر. مىنە ەندى ەل استاناسى افينا ماڭىندا جاڭا وت وشاعى تىركەلدى. ءتىلسىز جاۋ قالادان 60 شاقىرىم جەردەگى ۆيليا ەلدى مەكەنىنە جەتتى. قازىر اينالا قىزعىلت- سارى تۇسكە بويالعان.
ليزا، جەرگىلىكتى تۇرعىن:
- ءبىز ءورتتىڭ اۋىلعا تاياپ قالعانىن بىلگەن جوقپىز. ماماندار كەيىننەن كەلدى. سوندىقتان اينالامىز ورتەنىپ جاتقاندا تۇرعىندار باسى اۋعان جاققا قاشا باستادى.
كاليفورنيادا دا وسىنداي جاعداي. ماماندار ايماقتاعى ءتىلسىز جاۋدى سوندىرگەن ەدى. الايدا كەشە قاتتى جەل تۇرىپ، جاعداي قايتادان وزگەرىپ شىعا ەلدى. جەرگىلىكتى ەنەرگەتيكالىق كومپانيا اۋحالدىڭ ودان بەتەر ۋشىعۋىن بولدىرماۋ ءۇشىن قاۋىپتى ايماقتاردا ەلەكتر ەنەرگياسىن اجىراتىپ تاستادى. سالدارىنان 50 مىڭ ءۇي جارىقسىز قالدى.
جالپى قازىر وسى كاليفورنيادان بولەك، ا ق ش- تىڭ باسقا شتاتتارى دا اپتاپ پەن قۋاڭشىلىق زاردابىن تارتىپ وتىر. سالدارىنان 40 ميلليون ادامدى تىرشىلىك نارىمەن قامتاماسىز ەتىپ وتىرعان كولورادو وزەنىندە سۋ دەڭگەيى كۇرت تومەندەپ كەتكەن.
احۋالدىڭ ۋشىعۋىنا بايلانىستى كەلەسى جىلدىڭ باسىنان ەلدىڭ باتىسىنداعى شتاتتاردا سۋدىڭ بەرىلۋى شەكتەلەدى. ساراپشىلار ءانومالدى ىستىق پەن قۇرعاقشىلىقتىڭ سەبەبى جاھاندىق جىلىنۋ ەكەنىن ايتادى. وسى رەتتە تۇرعىندار مۇناي كومپانيالارىن وتەماقى تولەۋگە شاقىرىپ وتىر. ويتكەنى بۇل كاسىپورىندار اۋاعا كوپ مولشەردە زياندى زاتتار بولەدى.
ماماندار وسىلاي جالعاسا بەرەتىن بولسا، بولاشاقتا كاليفورنيادا ماڭگى قۇرعاقشىلىق ورناۋى مۇمكىن ەكەنىن ەسكەرتىپ وتىر.