پوليتسيا بالالاردىڭ توبەلەسى بەينەلەنگەن ۆيدەو تۋرالى مالىمەت ۇسىندى

نۇر-سۇلتان. قازاقپارات - الماتى وبلىسىنىڭ پوليتسيا دەپارتامەنتى قارشاداي بالالاردىڭ توبەلەسىپ جاتقانى بەينەلەنگەن ۆيدەو تۋرالى اقپارات ۇسىنىپ، وقيعانىڭ ءمان-جايىن ءتۇسىندىردى، دەپ حابارلايدى قازاقپارات ءتىلشىسى.

الماتى وبلىسى پوليتسيا دەپارتامەنتىنىڭ باسپا ءسوز قىزمەتى تاراتقان اقپارات بويىنشا، 14-تامىز كۇنى ساعات 17.00 شاماسىندا ىلە اۋدانىنىڭ پوليتسيا بولىمىنە بورالداي كەنتىندەگى ۆودنيك ىقشاماۋدانىنىڭ 34 جاستاعى تۇرعىنىنان قوڭىراۋ تۇسكەن. وقيعا ورنىنا كەلگەن ۋچاسكەلىك پوليتسيا ينسپەكتورلارى كوپ قاباتتى ءۇيدىڭ اۋلاسىندا 8 جاستاعى ەكى بالا توبەلەسىپ، كەيىن وعان ءبىرىنىڭ 14 جاستاعى اعاسى ارالاسقانىن انىقتاعان.

«قازىر ىلە اۋداندىق پوليتسيا ءبولىمى يۋۆەنالدى پوليتسيا توبىنىڭ قىزمەتكەرلەرى وسى ءىس بويىنشا ماتەريال جيناۋدا. جينالعان ماتەريال تاربيە سيپاتىنداعى شارالاردى قابىلداۋ ءۇشىن اۋدان اكىمدىگى جانىنداعى كامەلەتكە تولماعانداردىڭ ىستەرى جونىندەگى كوميسسياعا جىبەرىلەدى»، - دەپ جازادى دەپارتامەنتتىڭ باسپا ءسوز قىزمەتى.

ال وزىنەن جاسى كىشى بالاعا قول جۇمسادى دەلىنگەن 14 جاستاعى جەتكىنشەكتىڭ اتا- اناسى اكىمشىلىك جاۋاپقا تارتىلاتىن بولدى.

«توبەلەسكە قاتىسقان بالالار ءبىر اۋلادا تۇرادى. بالالار مەن ولاردىڭ اتا- انالارى ءوزارا تاتۋلاستى، ءبىر- بىرىنە نارازىلىقتارى جوق. الماتى وبلىسىنىڭ پوليتسيا دەپارتامەنتى تۇرعىنداردى جالعان اقپارات تاراتپاۋعا، جەلىدە ءجيى تارايتىن وسى سارىنداس ارانداتۋلارعا سەنبەۋگە شاقىرادى»، - دەلىنگەن پوليتسيا دەپارتامەنتىنىڭ رەسمي مالىمەتىندە.