ب ۇ ۇ-نىڭ اۋعانستانعا جاردەم كورسەتەتىن ۇيىمدارى الماتىعا ۋاقىتشا ورنالاستىرىلادى
بۇل تۋرالى قازاقپارات س ءى م سىلتەمە جاساپ حابارلايدى.
اۋعانستانداعى ىشكى ساياسي احۋالدىڭ شيەلەنىسۋىنە بايلانىستى بىرىككەن ۇلتتار ۇيىمى (ب ۇ ۇ) ءوزىنىڭ اۋعانستانعا جاردەم كورسەتۋ جونىندەگى ميسسياسىن (UNAMA) جانە ا ي ر- دا اككرەديتتەلگەن ب ۇ ۇ-نىڭ باسقا دا اگەنتتىكتەرىن الماتى قالاسىنا ۋاقىتشا ورنالاستىرۋ تۋرالى قازاقستانعا ءوتىنىش ءبىلدىردى.
قازاقستان مەن ب ۇ ۇ-نىڭ جان-جاقتى ءوزارا ءىس-قيمىلى رۋحى شەڭبەرىندە جانە وسى ۇيىمنىڭ تولىق قۇقىقتى مۇشەسى رەتىندەگى مىندەتتەمەلەرى اياسىندا پرەزيدەنت قاسىم-جومارت توقايەۆ ب ۇ ۇ ءوتىنىشىن قولداۋ تۋرالى شەشىم قابىلدادى.
18-تامىزدا كەشته UNAMA قىزمەتكەرلەرى بار العاشقى بورت الماتى اۋەجايىنا قوندى. كەلگەن قىزمەتكەرلەر حالىقارالىق ديپلوماتتار، ب ۇ ۇ پاسپورتتارى مەن يممۋنيتەتتەرىنىڭ يەگەرلەرى بولىپ تابىلادى.
الماتىدا UNAMA جانە باسقا دا ب ۇ ۇ اگەنتتىكتەرىنىڭ كەڭسەلەرىن ورنالاستىرۋ جانە ولاردىڭ ودان ءارى قىزمەت ەتۋى ۋاقىتشا، ياعني اۋعانستانداعى جاعداي تۇراقتالعانعا دەيىن، شامامەن جارتى جىلعا سوزىلادى دەپ كۇتىلۋدە. قىزمەتكەرلەردىڭ تۇرۋى، كەڭسە مەن ءۇي-جايلارىن جالعا الۋى جانە ت. ب. بارلىق شىعىستارى تولىعىمەن ب ۇ ۇ- نىڭ بيۋدجەتىنەن قارجىلاندىرىلادى.