باقىتجان ساعىنتايەۆ الماتىلىقتارعا ۇندەۋ جولدادى
«ەپيداحۋالدىڭ قانشالىقتى كۇردەلى ەكەنىن تۋعان- تۋىستان، اعايىننان، جورا-جولداستان ءبىلىپ وتىرسىز. ارالارىندا اۋىرىپ قالىپ جاتقاندار بار. ءتىپتى، قايتىس بولعاندار دا بار. بۇل دەگەنىمىز - ءالى كۇنگە دەيىن ەپيداحۋالدىڭ وتە كۇردەلى ەكەنىن تۇسىنبەگەنىمىزدە نەمەسە تۇسىنگىمىز كەلمەيتىنىندە. جەڭىل دەرت دەپ ويلايمىز. ءبىر جارىم جىل بولدى ىندەتپەن ارپالىسىپ كەلەمىز. ەگەر ءسىز ويلاعانداي جەڭىل بولاتىن بولسا، باياعىدا ءوتىپ كەتەر ەدىك. ونىڭ ءبىر شەشىمى جوق. ءار شتامم پايدا بولعان سايىن كۇردەلەنىپ بارادى. قازىر، مىنە، دەلتانى كورىپ وتىرمىز. وتە قيىن جاعدايعا الىپ كەلدى. ونى ناۋقاستاردىڭ سانىنان-اق كورۋگە بولادى. ءبىزدىڭ كلينيكالارعا كۇن سايىن 700-750 ناۋقاس تۇسەدى. تۇرعىنداردان ۆاكتسينا الۋعا ۇندەپ جاتىرمىز. ۆاكتسيناتسيانىڭ وزىنە قارسى قانشا اڭگىمە ايتىلدى. ۆاكتسينا كەرەك دەگەنگە سەنبەيمىز، كەرەك ەمەس دەگەنگە كوبىرەك سەنەمىز. ۆاكسيناسىز شەشىم جوق، وسىنى جاقسى ءتۇسىنۋ كەرەك»، - دەدى اكىم.
سونىمەن قاتار، قالا اكىمى شاھارداعى كارانتين تالابىن ساقتامايتىن تۇنگى مەكەمەلەردىڭ الدىنا پوليتسيا ءپاترۋلى قويىلعانىن تىلگە تيەك ەتتى.
«ءبارىبىر قوعامدىق ورىنداردا كوپ جۇرەمىز. كاسىپكەرلەردىڭ ەشقايسىسى كارانتين تالابىن ساقتامايدى، اسىرەسە، مەيرامحانالار مەن تۇنگى كلۋبتار. ءبىز قالاداعى 74 مەكەمەنىڭ الدىنا پوليتسيا ءپاترۋلىن قويعا ءماجبۇر بولدىق. ولاردىڭ ءوز جۇمىسى بار، ولار قالانىڭ قاۋىپسىزدىگىن قامتاماسىز ەتۋ كەرەك ەمەس پە؟ ولار كەرىسىنشە تۇنگى مەكەمەلەرگە جاستار جينالماسىن دەپ كۇزەتىپ تۇر. سىزدەردەن تاعى دا سۇرايمىن. جاۋاپكەرشىلىكپەن قاراۋىڭىزدى سۇرايمىن. بۇلاي جالعاسا بەرسە، بۇدان دا قاتاڭ شارالار قابىلدايمىز. مونيتورينگ توپتار ارالايدى، قاداعالايدى. ءبىراق بۇكىل قالانى جاۋىپ تاستاي المايدى. وتە اۋىر جاعدايدا تۇرمىز. دارىگەرلەر كۇندىز- ءتۇنى جۇمىس ىستەپ جاتىر. بۇلاي جالعاسا بەرسە، ورىندى قايدان تابامىز؟ ءقازىر ورىن جەتكىلىكتى. دەگەنمەن ساقتىق شارالارىنا بەي- جاي قاراماۋ كەرەك»، - دەدى قالا اكىمى.
اۆتور: الما مۇقانوۆا