قازاقستان پرەزيدەنتى كورەيا بيزنەسىنىڭ كوشباسشىلارىمەن كەزدەستى
جيىنعا قازاقستاندىق ءىرى كاسىپورىنداردىڭ باسشىلارى دا قاتىستى، دەپ حابارلايدى قازاقپارات اقورداعا سىلتەمە جاساپ.
قازاقستان پرەزيدەنتى ءسوز باسىندا مۋن چجە ينگە كورەيا رەسپۋبليكاسىنا مەملەكەتتىك ساپاردى جانە وسى ءىس- شارانى ۇيىمداستىرعانى ءۇشىن ريزاشىلىعىن ءبىلدىردى. مەملەكەت باسشىسى سەۋلگە ساپارىنىڭ باعدارلاماسى اسا تىعىز ەكەنىن اتاپ ءوتتى.
- 20- جانە 21- عاسىرداعى تاريحقا كوز جۇگىرتسەك، قازاقتار مەن كورەيلەردىڭ ءجۇرىپ وتكەن جولى كۇردەلى، ۇلكەن سىناقتاردان سىنباي وتكەنىن بايقاۋعا بولادى. دالىرەك ايتقاندا ازاماتتىق سوعىسىنا دا، ۇلى وتان سوعىسىنا دا قاتىستى. بابالارىمىز كوپتەگەن سىن تەزىنەن ءوتتى. سوعان قاراماستان، ءبىزدىڭ حالىقتارىمىز ءبىر بىرىنە يىق تىرەستىرە وتىرىپ، قيىنشىلىقتاردى جەڭە ءبىلدى. قازاقتار مەن كورەيلەر باۋىرلاس حالىقتارعا اينالدى، - دەدى مەملەكەت باسشىسى.
بۇل رەتتە قاسىم- جومارت توقايەۆ وڭتۇستىك كورەيا ءبىزدىڭ ەلدىڭ ءىرى سىرتقى ساۋدا جانە ەكونوميكالىق ارىپتەستەرىنىڭ ءبىرى ەكەنىن اتاپ ءوتتى. قازاقستان پرەزيدەنتى كورەيالىق بيزنەس وكىلدەرىنىڭ ازىق- تۇلىك، تاۋ- كەن بايىتۋ، اۆتوموبيل جانە ەكونوميكانىڭ باسقا دا سەكتورىندا تابىستى ەڭبەك ەتىپ جاتقانىن اتاپ ءوتتى.
قاسىم- جومارت توقايەۆتىڭ ايتۋىنشا، قازاق- كورەي ىنتىماقتاستىعىنىڭ زور الەۋەتى ءالى دە تولىق اشىلماعان. مەملەكەت باسشىسى قازاقستان ءوزىنىڭ 19 ميلليوندىق نارىعىنان بولەك، ەۋرازيالىق ەكونوميكالىق وداققا كىرۋ ءۇشىن ءتيىمدى الاڭنىڭ قىزمەتىن اتقارا الادى دەپ ەسەپتەيدى.
- قازاقستان 75 ميلليون تۇرعىنى بار ورتالىق ازيانىڭ ەكونوميكالىق تۇرعىدان ەڭ دامىعان ەلى بولىپ ەسەپتەلەدى. زاماناۋي قۇقىقتىق، سالىقتىق جانە قارجىلىق جۇيە مەن ورتالىق ازياداعى مىندەتتى تولەمدەرسىز ساۋدا جۇيەسى، قازاقستاندى وسى ايماقتا جۇمىس ىستەۋگە ەڭ قولايلى الاڭعا اينالدىرىپ وتىر، - دەدى مەملەكەت باسشىسى.
پرەزيدەنت ءبىزدىڭ ەلدەگى ينۆەستيتسيالىق احۋال تۋرالى ايتا كەلە، كورەي تاراپىن جاڭا ەرەجەلەرمەن، ياعني، جەكە قولداۋ شارالارى، زاڭنامالىق تۇراقتىلىق جانە ستراتەگيالىق ينۆەستورلارعا ەرەكشە جاعداي جاساۋدى قامتيتىن «ستراتەگيالىق ينۆەستيتسيالىق كەلىسىممەن» تانىستىردى.
مەملەكەت باسشىسىنىڭ ايتۋىنشا، بۇل تەتىك «سامال جەل» ەكونوميكالىق ىنتىماقتاستىق تۇجىرىمداماسىن جۇزەگە اسىرۋعا دا نەگىز بولماق. سونىمەن قاتار قاسىم- جومارت توقايەۆ جەر قويناۋىن پايدالانۋ، يننوۆاتسيالار مەن جاڭا تەحنولوگيالار، اتوم، بالامالى جانە جاڭارتىلاتىن قۋات كوزدەرى، مۇناي- گاز، ماشينا جاساۋ سالالارىندا ءتيىمدى جوبالار جۇزەگە اسىرۋعا مۇمكىندىك مول ەكەنىن اتاپ ءوتتى. مەملەكەت باسشىسى بۇلاردىڭ ءوزى ىنتىماقتاستىق ورناتۋعا بولاتىن بارلىق باعىت ەمەس ەكەنىن ايتتى. ول مەتاللۋرگيا، اۆتوموبيل جانە ازىق- تۇلىك ءوندىرىسى، دەنساۋلىق ساقتاۋ جانە ءبىلىم سالالارىندا وڭتۇستىك كورەيانىڭ ۇلكەن جەتىستىكتەرگە جەتكەنىن اتاپ ءوتتى.
پرەزيدەنت وسى اسا قيىن جولدا جيناقتاعان تاجىريبە، ءبىلىم مەن تەحنولوگيالار قازاقستاندا دا ۇلكەن سۇرانىستا ەكەنىن جەتكىزدى. ونىڭ ايتۋىنشا، قازاقستان بۇگىندە ەكونوميكانى سيفرلاندىرۋ جانە جاڭا تەحنولوگيالارعا كوشىرۋ كەزەڭىندە.
- ءبىز ينۆەستيتسيالىق جانە تەحنولوگيالىق ىنتىماقتاستىقتىڭ بارلىق باعىتى بويىنشا جۇمىس ىستەۋگە دايىنبىز. ول ءۇشىن قارجىلىق تا، ماتەريالدىق تا مۇمكىندىكتەر مەن دامىعان ينفراقۇرىلىم بار. ەڭ باستىسى - باسشىلىقتىڭ ساياسي نيەتى ءتۇزۋ، مەملەكەتتەرىمىزدىڭ اراسىندا تاتۋ بايلانىس ورناعان. سوندىقتان، مەن ءبىزدىڭ ىنتىماقتاستىعىمىزدىڭ بولاشاعىنا زور ءۇمىت ارتامىن.
قازاقستان رەسپۋبليكاسىنىڭ پرەزيدەنتى رەتىندە قول جەتكىزىلگەن كەلىسىمدەردىڭ جۇزەگە اسىرىلۋىنا جانە جالپى ەلدەرىمىزدىڭ ەكونوميكالىق ىنتىماقتاستىعىن نىعايتۋعا باعىتتالعان بارلىق ءىس- قيمىلدارعا مونيتورينگ جۇرگىزىپ، ءجىتى باقىلاپ وتىراتىنىمدى تاعى قايتالاپ ايتامىن، - دەدى قاسىم- جومارت توقايەۆ.
پرەزيدەنتى مۋن چجە ين ءوز سوزىندە قازاقستانمەن بىرلەسكەن ينۆەستيتسيالىق جوبالاردىڭ جۇزەگە اسىرىلۋىنا وڭتۇستىك كورەيا ۇكىمەت تاراپىنان تولىق قولداۋ بولاتىنىن ايتتى. ءىس- شارا بارىسىندا كورەيالىق Hyunday Motor Company «Samsung Electronics» ، «Doosan Heavy Industries Construction» ، «Lotte Confectionery» «POSCO International» ، «Celltrion, Dongil Construction» ، «KOTRA» كومپانيالارىنىڭ جەتەكشىلەرى ءسوز سويلەدى.
قازاقستان تاراپىنان پرەمەر- ءمينيستردىڭ ورىنباسارى رومان سكليار، «سامۇرىق- قازىنا» ۇ ا ق ءتوراعاسى، «Kaspi.kz» ا ق ديرەكتورلار كەڭەسىنىڭ ءتوراعاسى، «Mineral Product» ج ش س- نىڭ قۇرىلتايشىسى باياندامالار جاسادى.