قازاقستان پرەزيدەنتى قاسىم-جومارت توقايەۆتىڭ كورەيا رەسپۋبليكاسىنا مەملەكەتتىك ساپارى باستالدى - فوتو
09:04, 17 - تامىز 2021
نۇر-سۇلتان. قازاقپارات - قازاقستان پرەزيدەنتى قاسىم-جومارت توقايەۆتىڭ كورەيا رەسپۋبليكاسىنا مەملەكەتتىك ساپارى باستالدى، دەپ حابارلايدى قازاقپارات اقوردانىڭ رەسمي سايتىنا سىلتەمە جاساپ.
مەملەكەت باسشىسى قاسىم-جومارت توقايەۆتىڭ كورەيا رەسپۋبليكاسىنا مەملەكەتتىك ساپارى كوك ۇيدەگى رەسمي راسىمنەن باستالدى. قازاقستان پرەزيدەنتىن وڭتۇستىك كورەيا پرەزيدەنتى مۋن جە ين سالتاناتتى تۇردە قارسى الىپ، قۇرمەت كورسەتتى.
قازاقستان مەن وڭتۇستىك كورەيانىڭ مەملەكەتتىك ءانۇراندارى ورىندالعاننان كەيىن، مەملەكەتتەر باسشىلارى قۇرمەت قاراۋىلىن بويلاي ءوتىپ، ەكى ەلدىڭ تۋىنا تاعزىم ەتتى جانە رەسمي دەلەگاتسيالاردىڭ قۇرامىمەن تانىستىردى. بۇدان كەيىن قاسىم-جومارت توقايەۆ قۇرمەتتى قوناقتار كىتابىنا قولتاڭبا قالدىردى. وسىعان دەيىن مەملەكەت باسشىسى قاسىم-جومارت توقايەۆتىڭ كورەيا رەسپۋبليكاسىنا بارعانى حابارلانعان بولاتىن.