الەۋمەتتىك جەلىدە ۇ ب ت تاپسىرۋ كەزىندە زاڭ بۇزعان 19 تالاپكەردىڭ اراسىندا شوۋمەن تۇرسىنبەك قاباتوۆتىڭ قىزى ادەمى امانعالي دا بار دەگەن اقپارات تاراعان بولاتىن. تانىمال ءارتىس Instagram پاراقشاسىندا وسى شۋعا بايلانىستى مالىمدەمە جاسادى.
«ارمىسىزدار قۇرمەتتى وتانداستار! كەشەلى بەرى قىزۋ تالقىلانىپ جاتقان كەلەڭسىز وقيعانىڭ شىن مانىسىندە قالاي بولعانى تۋرالى تۇسىندىرە كەتكەندى ءجون سانادىم. اتا- انا رەتىندە بۇل وقيعا بىزگە دە وتە اۋىر ءتيىپ وتىر. قولداۋ ءبىلدىرىپ جاتقان جاندارعا زور راحمەت. وقيعا بويىنشا ايتارىم وسى ۆيدەودا»، - دەپ جازدى ول.
ۆيدەوداعى تۇرسىنبەك قاباتوۆ پەن ءوزىن «نۇربەك» دەپ تانىستىرعان جىگىتتىڭ اڭگىمەسىندە اۋەل باستا ەكى ارادا رەپەتيتورلىق تۋرالى كەلىسىم بولعانى ايتىلادى. ءسوز اراسىندا تۇرسىنبەك قاباتوۆ ءوزىنىڭ ۇ ب ت- داعى قۇيتىرقى ارەكەت تۋرالى حابارسىز بولعانى بىرنەشە رەت قايتالاپ ايتقان.
«كەشەدەن بەرى انا ورتالىقتارىڭا باردىم. جەكسەنبى بولىپ، جولدارىڭ بولىپ كەتتى دەسەم بولادى سەندەرگە. كەشە جاي عانا كەشىرىم سۇراپ، ۆيدەو جىبەرە سالىپسىڭدار، بەتىن بۇلدىراتىپ. وعان كىم سەنەدى»، - دەگەن شوۋمەن تۇتقانىڭ ار جاعىنداعى جىگىتتەن نەگە استىرتىن ارەكەتكە بارعانىن سۇرايدى.
«نۇربەك، سەن ماعان مىنانى ءتۇسىندىرشى. بولاتىن جاعدايدى نەگە سەن نەگە ماعان ايتپاي، اناسىنا ايتپاي، ونداي تىرلىككە باردىڭ؟ ەكىنشى قىز كىم؟ ونى كىم تاۋىپ ءجۇر، سەن بە»، - دەپ سۇرايدى.
تۇتقانىڭ ار جاعىنداعى داۋىس ۇ ب ت- عا ءارتىستىڭ قىزىن ءوزى دايىنداعاندىقتان، جوعارى بالل العىزىپ، «اتا- اناسىن توسىننان قۋانتقىسى كەلگەنىن» ايتقان. ءارى قاراي ەكەۋارا اڭگىمەدەن ادەمى تۇرسىنبەك قىزى امانعاليدىڭ ۇ ب ت كەزىندەگى قۇيتىرقى «ءتاسىل» تۋرالى تەستىلەۋگە كىرەر كەزدە عانا بىلگەنى تۋرالى ايتىلادى. سونداي- اق، تۇرسىنبەك قاباتوۆ قىزىنا و باستا ۇ ب ت- دان جوعارى بالل جيناۋ تۋرالى تالاپ قويماعانىن، شەتەلدە وقىتۋدى جوسپارلاعانىن ايتادى. «بىرەۋدىڭ اۋزىنان جىرىپ، بىرەۋدىڭ گرانتىن تارتىپ بەرەيىن دەگەن نيەتىم جوق»، - دەيدى ول ءسوز اراسىندا. ءسوز سوڭىندا تۇرسىنبەك قاباتوۆ ەندىگى ماسەلەنى قۇزىرلى ورگاندار شەشەتىنىن، تەك تۇسىنبەۋشىلىك سالدارىنان ەلدىڭ الدىندا ابىرويسىز اتقا قالعانىن ايتىپ قىنجىلادى.
«قاتەلەسپەيتىن ادام جوق. ماعان ەسكەرتىپ، اقىلداسۋىڭ كەرەك ەدى. قىزىم اكەسىنىڭ كوزىنە قاراپ سويلەمەيتىن قىز. ۇ ب ت- دا زاڭسىز ارەكەتكە بارماق تۇگىل، قالانى دۇرىس بىلمەيدى. مەكتەپ پەن ءۇيدىڭ اراسىنا ماشينەمەن اپارىپ، اكەلىپ جۇرگەن بالا. تەرگەۋ ءجۇرىپ جاتسا، زاڭ بار. كەشىرمەيدى ەمەس، كەشىرەم عوي. ەلدىڭ الدىندا ابىرويىما نۇقسان كەلدى»، - دەگەن شوۋمەن ءىستىڭ بايىبىنا بارماي، ادەمى امانعاليدىڭ دەربەس دەرەكتەرى مەن سۋرەتىن جەلىگە سالعان ينتەرنەت قولدانۋشىلارعا رەنىشىن بىلدىرەدى.